ВАШЫНГТОН. Прэзыдэнт Злучаных Штатаў Джордж Буш назваў захаваньне статус-кво ў дачыненьні да Іраку “абсалютна непрымальным”. Буш зрабіў гэткую заяву ў штотыднёвым радыёзвароце пасьля няўдалых спробаў дамагчыся ад Арганізацыі Аб’еднаных Нацыяў падтрымкі плянам адхіленьня ад улады Садама Хусэйна. У звароце Буш паўтарыў тэзы сваёй прамовы на сэсіі Генэральнай асамблеі ААН, абвінаваціўшы Садама ў падтрымцы тэрарызму і спробах вырабіць зброю масавага зьнішчэньня.