ПРАГА. Брытанскі прэм’ер-міністар Тоні Блэйр прыбыў у Прагу для перамоваў з чэскім калегам Мілашам Зэманам. Цягам свайго першага візыту ў Чэхію ў якасьці кіраўніка брытанскага ўраду Блэйр таксама плянуе сустрэцца са сьпікерамі палат парлямэнту ды з былымі пілётамі Чэхіі, якія служылі ў Брытаніі падчас другое ўсясьветнае вайны. Блэйраў візыт адбываецца пасьля ягонай сустрэчы з Джорджам Бушам у Тэксасе, дзе два лідэры абмеркавалі мажлівую ваенную апэрацыю супраць рэжыму ірацкага прэзыдэнта Садама Хусэйна.