ЕРУСАЛІМ. Прэсавы сакратар міністэрства замежных справаў Ізраілю Эмануэль Нахсон паведаміў, што Ізраіль не пагадзіцца зь мірным плянам Савудаўскай Арабіі ў цяперашняй форме. Плян заклікае Ізраіль вывесьці свае войскі з усіх акупаваных у 1967 годзе палестынскіх тэрыторыяў у абмен на мір і нармалізацыю дачыненьняў паміж Ізраілям і арабскім сьветам. Прапанова Арабіі была ўхвалена ўчора лідарамі арабскіх краінаў на двухдзённым саміце арабскай лігі ў Бэйруце. Саміт таксама заклікаў Ізраіль прызнаць палестынскую дзяржаву і прыняць “справядлівае рашэньне” праблемы палестынскіх уцекачоў. Прадстаўнік ізраільскага зьнешнепалітычнага ведамства Эмануэль Нахсон заявіў, што права на вяртаньне мільёнаў палестынскіх уцекачоў разбурыць габрэйскі характар дзяржавы Ізраіль.