СТРАСБУР. Духовы лідэр Тыбэту Далай Лама папярэдзіў аб недапушчальнасьці злоўжываньня рэлігіяй для распальваньня нянавісьці. Выступаючы перад дэпутатамі Эўрапарлямэнту ў Страсбуры, Далай Лама сказаў, што ў выніку злоўжываньня рэлігіяй і заахвочваньня нецярпімасьці ў сьвеце забіваюцца людзі, зьнішчаюцца супольнасьці, дэстабілізуецца грамадзтва. Далай Лама лічыць, што пасьля тэрарыстычных нападаў 11 верасьня міжнародная супольнасьць мусіла б выпрацаваць пачуцьцё глябальнай адказнасьці, каб любыя канфлікты маглі вырашацца шляхам дыялёгу і адмовы ад гвалту.