КАБУЛ. Паведамляецца, што амэрыканская авіяцыя наносіць новыя ўдары па аб’ектах талібаў каля сталіцы Афганістану Кабулу. Сэрыя моцных выбухаў чулася на паўночны захад і на ўсход ад Кабулу ў пятую ноч амэрыканскай паветранай апэрацыі. Раней паведамлялася пра бамбаваньне аб’ектаў на поўдзень ад Кабулу, дзе верагодна быў зьнішчаны склад узбраеньня. Уначы наносіліся ўдары і па горадзе Кандагар на поўдні краіны. Міністар абароны Злучаных Штатаў Доналд Рамсфэлд паведаміў, што амэрыканскім самалётам, што ўдзельнічаюць у апэрацыі, надалей пагражае супрацьпаветраная абарона талібаў. Гэтая пагроза паходзіць ад ракетаў тыпу «стынгер», гелікоптэраў і самалётаў МіГ. У аўторак Рамсфэлд быў сказаўшы, што супрацьпаветранай абароне талібаў нанесеная такая шкода, што цяпер налёты могуць адбывацца ў любы час. Рамсфэлд сказаў таксама, што паветраныя ўдары не скіраваныя на цывыльныя аб’екты, аднак падчас такіх удараў цывільныя ахвяры бываюць непазьбежныя.