ТАШКЕНТ. Адна тысяча амэрыканскіх вайскоўцаў прыбывае ва Ўзбэкістан, каб падтрымаць кампанію ЗША супраць тэрарыстаў у суседнім Афганістане.
Гэтыя атрады зьяўляюцца першымі рэгулярнымі вайсковымі падразьдзяленьнямі, якія паводле рашэньня Міністэрства абароны ЗША разгортваюцца ў Сярэдняй Азіі.
Дэталі адносна месца іх разьмяшчэньня не паведамляюцца.
Прэзыдэнт Узбэкістану Іслам Карымаў учора абвесьціў, што амэрыканскія вайсковыя самалёты і наземныя падразьдзяленьні выкарыстаюць адну ўзбэцкую авіябазу з мэтай падтрымкі антытэрарыстычнай апэрацыі.
Карымаў таксама зазначыў, што войскі ЗША могуць выкарыстаць Узбэкістан толькі дзеля гуманітарных і выведных дзеяньняў. Ён падкрэсьліў, што ўзбэцкая тэрыторыя ня можа быць выкарыстаная для баявых апэрацыяў у Афганістане.
Гэтае спавешчаньне было зробленае пасьля перамоваў Карымава з міністрам абароны ЗША Доналдам Рамсфэлдам.