ЕРУСАЛІМ. Ізраільскія войскі нанесьлі ўчора ракетны ўдар па блёкпасту палестынскіх сілаў бясьпекі ў населеным пункце Бэйт-Ханун на поўначы паласы Газа. Паводле дадзеных палестынцаў, паранены адзін чалавек.
Удар быў нанесены ў адказ на мінамётны абстрэл у сераду гэбрайскага пасяленьня ў паласе Газа.
Міністар замежных справаў Ізраілю Шыман Пэрэс выказаў сумнеў ў магчымасьці сустрэчы бліжэйшым часам з кіраўніком Палестынскай аўтаноміі Ясэрам Арафатам.
Каардынатар міжнароднай палітыкі Эўрапейскага Зьвязу Хавіер Саляна, які знаходзіцца зараз на Блізкім Усходзе, спрабуе наладзіць сустрэчу Пэрэса і Арафата ў пятніцу ў Італіі, дзе абодва лідэры будуць браць удзел у міжнароднай канфэрэнцыі.
Разам з тым Пэрэс падкрэсьліў, што спробы дасягнуць спыненьня вагню будуць працягнутыя.
Паводле палестынскіх афіцыйных асобаў, сустрэча Пэрэса і Арафата стане магчымай толькі пасьля нарады міністраў замежных справаў арабскіх краінаў, якая адбудзецца ў нядзелю ў Каіры.