Лінкі ўнівэрсальнага доступу

НОВЫ СКАНДАЛ ВАКОЛ БЕЛАРУСКІХ ЛЕКАЎ У ЛАТВІІ


Юры Сьвірко, Менск

Міністэрства аховы здароўя Латвіі адклікала з продажу ў аптэках усе таблеткі беларускай вытворчасьці. Такое рашэньне было прынятае пасьля таго, як у Рызе два чалавекі, мужчына і жанчына, пацярпелі ад ужываньня “цытрамону П”, які вырабілі “Белмэдпрэпараты”. У абедзьвюх шпіталізаваных ахвяраў зафіксавалі гіпаклікемію—– рэзкае зьмяншэньне ўзроўню цукру ў крыві. Шмат якія хворыя скардзіліся на беларускі цытрамон аптэкаркам, але да доктара не пайшлі.

Тая самая хвароба была зарэгістраваная раней у больш як двух дзясяткаў чалавек, якія прымалі ў Латвіі беларускі “аскафэн П”, у якім былі выяўленыя небясьпечныя прымесі гібэнкляміду. Менавіта гэтае рэчыва зьмяншае ўзровень цукру ў крыві. Латвійскія адмыслоўцы паведамляюць, што ў беларускім цытрамоне гібэнкляміду ўтрая менш, чымсьці ў аскафэне, аднак таблеткі ўсё адно небясьпечныя для здароўя. І аскафэн, і цытрамон былі зробленыя ў Беларусі ў адзін час і маюць аднолькавы сэрыйны нумар 010104.

Вытворца гэтых таблетак — “Белмэдпрэпараты” — ад камэнтароў адмаўляецца, хаця раней прызнаў сваю віну ў справе з аскафэнам і пісьмова пагадзіўся выплаціць Латвіі больш за 10500 латаў (гэта каля 20 тысяч даляраў). На ўсе пытаньні пра Латвію сакратарка дырэктара “Белмэдпрэпаратаў” адказвае, што камэнтароў ня будзе, пакуль ня выяўленыя ўсе абставіны справы.

Прадстаўніца Міністэрства аховы здароўя Беларусі Ала Даўгалікава распавяла Радыё Свабода, што пра новыя выпадкі захворваньня ў Латвіі міністэрскія чыноўнікі ведаюць, але “Белмэдпрэпараты” ня вельмі ахвотна перадаюць інфармацыю нават ім.

(Даўгалікава: ) “Наконт кампэнсацыі выдаткаў — каля 20 тысяч даляраў — мы накіравалі ім ліст з просьбай даць інфармацыю да 1 чэрвеня. Нам інфармацыя пакуль не паступала”.

На маё пытаньне, якая прычына выпуску ў Беларусі небясьпечных для здароўя таблетак аскафэну, спадарыня Даўгалікава адказала гэтак:

(Даўгалікава: ) “Фактычна прычына ня выяўленая. Можна рабіць толькі лягічныя высновы. Паводле прадстаўленай дакумэнтацыі, паколькі была прадстаўленая ня нейкая там паперка, напісаная ўчора для камісіі, а праводзілася праверка журналаў, якія вядуцца даўно, у вызначаным парадку, у храналягічным парадку, у якіх рэгіструюцца парамэтры тых або іншых вытворчых працэсаў, — не было выяўлена парушэньняў”.

На тое ж пытаньне аб прычыне выпуску небесьпечнага аскафэну прэсавы сакратар Міністэрства аховы здароўя Латвіі Зайга Барвіда дала гэткі адказ:

(Барвіда: ) “Тое, што нам распавядалі “Белмэдпрэпараты”, мы ведаем — чалавечы чыньнік. Зусім выпадкова там пераблыталі мяхі”.

Спадарыня Барвіда падкрэсьліла, што і аскафэн, і цытрамон “Белмэдпрэпараты” вырабілі сёлета адначасова. Яна дадала, што ў Латвію пастаўлялася 15 найменьняў беларускіх лекаў, якія выпускаюць у таблетках. Цяпер яны ўсе пад падазрэньнем, і гандаль імі ў Латвіі цалкам спынены. Што да цытрамону, дык Зайга Барвіда заявіла:

(Барвіда: ) “Ад сёньняшняга дня мы просім людзей, каб яны прынесьлі гэты цытрамон у аптэку. Каб мы маглі іх зноў сабраць разам і потым аддаць назад у “Белмэдпрэпараты” на аналізы і на зьнішчэньне”.

Спадарыня Барвіда падкрэсьліла, што пасьля 1 траўня у Латвію, якая далучылася да Эўразьвязу, увесь імпарт лекаў зь Беларусі быў спынены, таму што ніводнае беларускае прадпрыемства не адпавядае прынятым у Эўропе стандартам GMP.

(Барвіда: ) “У вас няма там GMP, і мы ня можам больш імпартаваць пасьля 1 траўня вашыя мэдыкамэнты. Мы можам толькі прадаваць тыя, што закупленыя да 1 траўня”.
XS
SM
MD
LG