Лінкі ўнівэрсальнага доступу

НАЙЛЕПШЫ СЯБАР АМЭРЫКІ Ў ІРАКУ ПЕРАСТАЎ БЫЦЬ НАЙЛЕПШЫМ?


Ганна Соусь, Прага

(Чалабі: ) "Я – найлепшы сябар Амэрыкі ў Іраку".

Безумоўна, гэтыя словы Ахмэда Чалабі, прамоўленыя пасьля ўчорашняга рэйду на ягоную багдадзкую рэзыдэнцыю, у свой час адпавядалі рэчаіснасьці.

Раней Ірацкі нацыянальны кангрэс, які ён ўзначальваў, атрымліваў ад ЗША па 335 тысячаў даляраў штомесяц за інфармацыю пра сытуацыю ў Іраку, якая, як высьветлілася, была недакладнай.

Цяпер жа, як вынікае са словаў дзяржсакратара ЗША Коліна Паўэла, Чалабі стаў парыяй у Вашынгтоне. Вось як у мінулую нядзелю Колін Паўэл згадваў люты 2003 году, калі яму не ўдалося ўпэўніць Раду бясьпекі ААН у тым, што Ірак мае зброю масавага зьнішчэньня.

(Пауэл: ) “У той час, калі я рабіў выступленьне, яно выражала калектыўнае меркаваньне, заснаванае на прапанаваных нам дадзеных. Але аказалася, што крыніцы інфармацыі недакладныя і няверныя, і ў некаторых выпадках нас наўмысна ўводзілі ў зман. І я шкадую й расчараваны гэтым”.

Тую інфармацыю, якой карыстаўся Колін Паўэл, часткова забясьпечваў Ірацкі нацыянальны кангрэс у выгнаньні на чале з Ахмэдам Чалабі. Напрыклад, сьцьвярджалася, што іракцы зь цеплынёй сустрэнуць амэрыканскіх вайскоўцаў, як толькі будзе скінуты Садам Хусэйн. Некаторыя асобы ў Адміністрацыі Джорджа Буша, уключна з Колінам Паўэлам, сумняваліся ў асобе Чалабі, аднак іншыя, напрыклад, міністар абароны Доналд Рамсфэлд і ягоны намесьнік Пол Вулфавіц выкарыстоўвалі яго. Менавіта празь іх Чалабі меў уплыў на палітыку Вашынгтону ў Іраку і стаў сябрам прызначанай ЗША Кіроўнай рады Іраку.

Паводле Ахмэда Чалабі цяперашняя амэрыканская варожасьць да яго зьвязана з расьсьледаваньнямі злоўжываньняў у рэалізацыі Праграмы ААН у Іраку “Нафта ў абмен на харчаваньне” у часы Садама Хусэйна.

Учора ў Багдадзе прадстаўнік сілаў кааліцыі Дэн Сэнар заявіў, што ператрус ў доме Чалабі адбыўся на ініцыятыву ірацкіх уладаў, і ня мае ніякага дачыненьня да праграмы “Нафта ў абмен на харчаваньне.”

Прадстаўнік Дзярждэпартамэнту ЗША Рычард Баўчэр сказаў, што рэйд ня быў палітычна матываваны, і быў зьвязаны з пэўнымі крымінальнымі пытаньнямі. Аднак шмат якія аглядальнікі лічаць, што бяз згоды амэрыканцаў рэйд бы наўрад ці адбыўся.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG