Акрамя таго, выкладчыцкі калектыў ЭГУ асьцерагаецца, што ўмовы працы, усталяваныя новай ліцэнзіяй, будуць для ўнівэрсытэту непрымальныя.
Тэлефанаграма пра тое, што праблема ліцэнзаваньня ВНУ вырашаная станоўча, паступіла ва ўнівэрсытэт пад канец дня 7 траўня. Паведамлялася, што адпаведны загад міністар Аляксандар Радзькоў падпісаў яшчэ 30 красавіка. Але кіраўніцтва навучальнай установы ўпэўненае, што гэты дакумэнт выйшаў заднім чыслом. Вось што сказаў у інтэрвію Радыё Свабода прарэктар ЭГУ Ўладзімер Дунаеў:
(Дунаеў: ) “Што яны дагэтуль, увесь тыдзень ня ведалі, што яны прынялі рашэньне? Зразумела, што яны павінныя былі зрабіць гэта да 1 траўня, вось і зрабілі”.
Нагадаю, што да 1 траўня Міністэрства адукацыі мусіла завершыць пераліцэнзаваньне навучальных установаў. Аднак цягам гэтага тыдня ЭГУ ня меў ніякай афіцыйнай інфармацыі пра свой далейшы лёс. Таму кіраўніцтва ВНУ было вымушанае спыніць фінансавую і адукацыйную дзейнасьць. Вось як пракамэнтавала перадсьвяточнае рашэньне Мінадукацыі дэкан факультэту права ўнівэрсытэту Ала Сакалова:
(Сакалова: ) “Першы крок нашай перамогі мы адчулі, але поўнай радасьці няма. Мы ня ведаем, якія ўмовы гэтай ліцэнзіі: адносна будынкаў, навучальнага працэсу, іншых аспэктаў дзейнасьці. Мы быццам бы ведаем дату загаду, ягоны нумар, але пакуль мы яго не прачыталі. То бок, мы чакаем наступнага кроку”.
Паводле спадарыні Сакаловай, пра магчымае аднаўленьне заняткаў студэнтам будзе абвешчана толькі ў панядзелак. Таму гэтымі днямі яны працягвалі збор подпісаў у абарону сваёй Alma Mater, распачаты некалькі дзён таму. Падзеі вакол ЭГУ яны камэнтавалі гэтак:
(Студэнт: ) “Ня ведаю, каму гэта патрэбна. У Міхайлава да таго ж яшчэ цэлая гара праблемаў. Якіх менавіта — ніхто высьветліць ня можа”.
(Стадэнт: ) “Мы першы курс, і вельмі шкада працы, укладзенай у нас і іншых студэнтаў. Але гэта сапраўдная трагедыя для старшых курсаў, якія гатовыя да дарослага жыцьця”.
(Студэнтка: ) “Мы ўсімі рукамі “за”, каб яго не закрылі”.
(Студэнтка: ) “Гэта можа пагубіць шмат лёсаў студэнтаў, бо гэта другая радзіма, як і Беларусь”.
Паводле кіраўніцтва навучальнай установы, грошы на навучаньне, дасланыя ўнівэрсытэту эўрапейскімі грантадаўцамі, заблякаваныя прэзыдэнцкай адміністрацыяй па-ранейшаму.
