Як адаб’ецца на канкурэнтаздольнасьці беларускіх тавараў на ўсясьветных рынках падвышэньне коштаў на расейскі газ? Адказваючы на гэтае пытаньне Радыё Свабода, міністар эканомікі Мікалай Зайчанка зазначыў наступнае:
(Зайчанка: ) “Безумоўна, гэта адбіваецца на канкурэнтаздольнасьці. Зь іншага боку, доля энэргетыкі ў агульных выдатках складае 9,5–10%. Падвышэньне цэнаў на газ, якое мы зрабілі для рэальнага сэктару (гэта 24%) прывядзе да аб’ектыўнага росту ў сярэднім недзе на 2,5%. Зразумела, каб кампэнсаваць гэта, трэба ладзіць іншыя мэрапрыемствы ў справе эканоміі выдаткаў. Паколькі мы сёньня гандлюем на зьнешніх рынках, дзе склаліся цэны попыту й прапановы, і нікому нецікава, які кошт на газ у вас быў учора, і які ён сёньня”.
Міністар Мікалай Зайчанка паведаміў, што яшчэ пры распрацоўцы прагнозу сацыяльна-эканамічнага разьвіцьця Беларусі на 2004 год пралічваліся варынты кошту на газ 50 даляраў.
(Зайчанка: ) “З 1 студзеня ў краіне дзейнічаюць цэны для рэальнага сэктару, зыходзячы з цэнаў на газ на ўваходзе, які мы сёньня рэальна аплачваем незалежным пастаўшчыкам, а гэта 46,68 даляра за тысячу кубоў. Было бы лепей мець больш танны газ, адпаведна й электраэнэргія, і цеплавая энэргія былі бы таньнейшыя. Тым ня менш, нават у рамках гэтых парамэтраў, калі цэны не перавысяць 50-даляравага ўзроўня, то гэта не ўплывае на надзейнасьць прагнозаў”.
Мікалай Зайчанка паведаміў, што вядзецца пошук кампаніі, якая правядзе незалежную ацэнку “Белтрансгазу”.
(Зайчанка: ) “Ёсьць балянсавая ацэнка “Белтрансгазу”, яна складае 600 мільёнаў даляраў. Але мы зыходзім з таго, што рынкавая ацэнка, на чым заўсёды настойвае Расейская Фэдэрацыя, вагаецца, паводле нашых ацэнак, ад 3 да 5 мільярдаў даляраў. Мы дамовіліся, што незалежную ацэнку правядзе кампанія, якой давярае й Беларусь, і Расея. Такі сьпіс расейскі бок прадставіў, беларускі бок у сваю чаргу прадставіў расейскаму боку свой пералік. Прыкладна такая ж, як наша, газатранспартная сыстэма ў Славаччыне была ацэненая на 3,5 мільярда даляраў. Ацэнку правяла аўстрыйская кампанія “Райфайзэнінвэст”, — паведаміў міністар эканомікі Беларусі Мікалай Зайчанка.
Што да перагляду беларуска-расейскіх пагадненьняў, пра што заяўляў надоечы Аляксандар Лукашэнка, то Мікалай Зайчанка зазначыў наступнае:
(Зайчанка: ) “У кампэтэнцыі Міністэрства эканомікі знаходзіцца рэалізацыя пагадненьняў аб увядзеньні расейскага рубля, адзінай валюты. Прыкладам, пагадненьне аб роўных умовах у галіне цэнавай палітыкі, якое было падпісанае 12 красавіка 2002 году, сёньня па сутнасьці ў аднабаковым парадку дэнансаванае Расейскай Фэдэрацыяй. Не выконваецца ключавы артыкул гэтага пагадненьня наконт цэнаў пятага поясу на мяжы з Расейскай Фэдэрацыяй”.
