Актывістам Свабоднага прафсаюзу прад’явілі санкцыю на ператрус за подпісам прокурора Кастрычніцкага раёну спадара Шчытнікава. Паводле заявы міліцыянтаў, яны затрымалі наркамана, і той паведаміў, што праз падробленыя аддрукаваныя на кампутары блянкі атрымліваў у аптэках псыхатропныя рэчывы. Міліцыянты кажуць, што наркаман назваў прафсаюзны кампутар, а каб пераканацца, так гэта ці не, вырашылі завесьці кампутар у аддзяленьне на экспэртызу.
Спробы даведацца, на якой падставе забіраюць тэхніку, заклікі да законнасьці, вынікаў не прынесьлі. Міліцыянты спасылаліся на загад начальніка.
(Першы міліцыянт: ) “Усе пытаньні будзеце ставіць да сьледчага”.
(Другі міліцыянт: ) “Так!”
(Першы міліцыянт: ) “Мы займаемся чарнавой працай. Мы сышчыкі”.
(Другі міліцыянт: ) “Я тэлефанаваў цяпер сьледчаму, можа, ня будзем забіраць тэхніку. Ён сказаў “Не, забірайце!”
Пасьля перамоваў міліцыянты паабяцалі хутка вярнуць прафсаюзам тэхніку, занесьлі яе ў машыну і зьехалі. Магілёўскай арганізацыі Свабоднага прафсаюзу нейкі час ня будзе на чым працаваць. Вось як пракамэнтаваў дзеяньні міліцыі прадстаўнік магілеўскай рады Свабоднага прафсаюзу Сяргей Фамін:
(Фамін: ) “Я думаю, тут адбылося нейкае непаразуменьне. Міліцыянты прыйшлі, прад’явілі ордэр на ператрус, канфіскавалі сыстэмны блёк і прынтэр для правядзеньня экспэртызы. Я думаю, разьбяруцца, і непаразуменьне будзе вырашанае”.
