Лінкі ўнівэрсальнага доступу

logo-print

АМАЛЬ ПАЛОВА ПРАГНОЗНЫХ ПАРАМЭТРАЎ ЛЕТАСЬ БЫЛА НЯ ВЫКАНАНАЯ


Юры Сьвірко, Менск

Акрамя прагнозаў разьвіцьця Беларусі на пяцігодкі, якія зацьвярджаюцца на гэтак званых Усебеларускіх сходах, ствараюцца таксама штогадовыя прагнозы. Ніводзін зь іх за апошнія гады цалкам выкананы ня быў. І сёньня на паседжаньні Савету Міністраў у дакладзе віцэ-прэм’ера Сяргея Сідорскага было пацьверджана, што амаль палова прагнозных паказьнікаў нявыкананыя.

Прэсавы сакратар прэм’ер-міністра Іван Знаткевіч распавёў:

(Знаткевіч: ) “У мінулым годзе з 16 даведзеных паказчыкаў сацыяльна-эканамічнага разьвіцьця выканана 9. Зь іх асноўныя выкананыя, аднак ёсьць яшчэ шмат напрамкаў, на якіх належыць працаваць, і прэм’ер засяродзіў увагу прысутных міністраў на тым, што многія зь іх спазьняюцца з прыняцьцем кіраўніцкіх рашэньняў. Плянуецца, што канчаткова вынікі году будуць разгледжаныя ў прэзыдэнта Рэспублікі Беларусь 11 лютага”.

На сёньняшнім паседжаньні адзначалася, што прагноз не супаў з рэчаіснасьцю перадусім у сфэрах, зьвязаных з сельскай гаспадаркай. А да выкананых парамэтраў урад адносіць, напрыклад, рост валавага ўнутранага прадукту (амаль на 5 адсоткаў) і павелічэньне рэальных грашовых даходаў насельніцтва. Аднак незалежныя эканамісты падкрэсьліваюць, што шмат якія прадпрыемствы працуюць на склад і сваю прадукцыю прадаць ня могуць, а жыхары Беларусі, нягледзячы на статыстыку, шмат чаго ня могуць купіць, бо іхныя даходы насамрэч не растуць, а зьмяншаюцца. Гаворыць эканаміст Міхал Залескі:

(Залескі: ) “Атрымліваецца, што парамэтры прызначаюцца самі па сабе, а жыцьцё йдзе само па сабе, і не заўсёды выконваюцца яны. Самае галоўнае, дзе правалы бываюць – гэта па інвэстыцыях.

Як заўсёды, выдатна ў нас расьце валавы ўнутраны прадукт. Але трэба ўлічваць саму працэдуру разьліку гэтага паказчыку: зьмяншэньне адмоўнага сальда замежнага гандлю павялічвае паказчыкі па валавым унутраным прадукце. Зьмяншаецца імпарт – і паляпшаюцца паказчыкі.

З другога боку, заўсёды радуюць насельніцтва ростам яго жыцьцёвага ўзроўню. Але калі мы паглядзім на рэальны таваразварот – колькі людзі купляюць тонаў, штукаў, мэтраў розных рэчаў і колькі людзі бяруць платных паслугаў, дык акажацца, што ня так ужо моцна гэты ўзровень і расьце. Насамрэч ідуць апэрацыі зь нейкімі фікцыямі”.
XS
SM
MD
LG