Міліцыя чакала, што сёньня прыйдзе шмат людзей. Перад дзьвярыма Ленінскага суду Горадні стаяла ахова. Міліцыянты дзяжурылі таксама на ўсіх трох паверхах.
Усярэдзіну прапусьцілі самога Іваноўскага, ягонага прадстаўніка і карэспандэнта Свабоды. На вуліцы засталіся чалавек 20. Яны зьвярнуліся па дапамогу ў пракуратуру. Але пазьней дапусьціў іх у залю судзьдзя Дземчанка на хадайніцтва Зьмітра Іваноўскага.
Разгляд адбываўся ў 15-й залі, дзе летась судзілі журналістаў “Пагоні” Міколу Маркевіча і Паўла Мажэйку. Там зьмена — зьявілася мэталёвая клетка.
Судзьдзя апытаў сьведак, прагледзеў апэратыўныя відэаздымкі ўчорашняга сходу прадпрымальнікаў. Затым паведаміў, што прысуд Іваноўскаму зачытае заўтра зраніцы.