Лінкі ўнівэрсальнага доступу

МНОГІЯ БЕЛАРУСЫ ЛІЧАЦЬ, ШТО ДЗЯРЖАВА НЕ ПАВІННА СТВАРАЦЬ ІДЭАЛЁГІЮ НА ПРЫНЦЫПАХ АДНОЙ КАНФЭСІІ


Альгерд Невяроўскі, Менск

Пераважная большасьць апытаных на вуліцах Менску лічыць, што дзяржаўная ідэалёгія Беларусі не павінна грунтавацца на прынцыпах адной, няхай сабе й самай буйной канфэсіі.

(Cпадар: ) “Я ня ў добрых стасунках з праваслаўем, таму не магу вам нічога добрага сказаць”.

(Дзяўчына: ) “Ня вельмі добра. Лічу, што рэлігія не павінна быць разам з ідэалёгіяй”.

(Іншая дзяўчына: ) “Ніякіх праваслаўных прынцыпаў у ідэалёгіі прэзыдэнта няма. Вельмі дрэнна, што ён прыціскае каталіцкую канфэсію. Я ўвогуле ня вельмі добра стаўлюся да яго палітыкі”.

(Спадарыня: ) “Ня мае ніякага значэньня — праваслаўны ты, ці іншага веравызнаньня. Вельмі важна, каб чалавек верыў у Бога і быў хрысьціянінам”.

(Спадар: ) “Рэлігія і ідэалёгія — абсалютна розныя рэчы. Таму праваслаўе ня можа быць дзяржаўнай ідэалёгіяй. Тым больш у нас шматканфэсійная краіна. нямала каталікоў, юдэяў, мусульманаў. Таму, лічу, гэта няправільна”.

(Хлопец: ) “Так не павінна быць. Калі ў нас цывілізаваная дзяржава, павінны быць ідэалёгіі розных канфэсіяў”.

(Спадарыня: ) “На мой погляд, ніякая рэлігія ня мусіць быць у аснове дзяржаўнай ідэалёгіі. Толькі агульначалавечыя прынцыпы. Няма сэнсу рабіць канфэсійную ідэалёгію дзяржаўнай, калі ў краіне жыве шмат прадстаўнікоў розных канфэсіяў і нацыянальнасьцяў. Тым больш, што беларускі народ спрадвеку вызнае вельмі чалавечыя прынцыпы, якія нельга падмяніць нічым. У нас вельмі добрыя карані, мы моцна стаім на зямлі — і ня трэба нічога за вушы прыцягваць”.

(Спадар: ) “Усё павінна быць свабодна ад дзяржаўнай улады. ніякай дыктатуры тут быць не павінна”.

(Маладая жанчына: ) “Я не лічу, што царква павінна ўваходзіць у сьвецкае жыцьцё. Яны павінны быць падзеленыя. А выказваньне, што праваслаўная ідэалёгія ўвайшла ў беларускі соцыюм — я не магу з гэтым пагадзіцца”.

Але ёсьць і тыя, хто лічаць нармальнай зьявай стварэньне дзяржаўнай ідэалёгіі на аснове праваслаўя:

(Дзяўчына: ) “Я за тое, каб у аснове было праваслаўе. Таму што вера павінна быць. Калі гэта нешта духоўнае, то вельмі добра”.

(Хлопец: ) “Праваслаўе — гэта трывалая аснова. Тут больш праваслаўных людзей, таму, відаць, ён сказаў слушна”.

(Спадарыня: ) “Добра стаўлюся да гэтай зьявы. Таму, што ў Беларусі жыве большасьць праваслаўных вернікаў. А ў Канстытуцыі запісана, што іншыя канфэсіі маюць у нашай дзяржаве роўныя правы. Таму ніякага супрацьстаяньня я тут ня бачу”.
XS
SM
MD
LG