Лінкі ўнівэрсальнага доступу

ДЭМАКРАТЫЧНЫЯ ПРАФСАЮЗЫ ПРАІГНАРАВАЛІ РАШЭНЬНЕ ФЭДЭРАЦЫІ ПРА 10-РАЗОВАЕ ПАВЕЛІЧЭНЬНЕ АРЭНДНАЙ ПЛАТЫ


Міхал Стэльмак, Менск

Дэмакратычныя прафсаюзы праігнаравалі ўльтыматум Фэдэрацыі прафсаюзаў пра новую арэндную плату прафсаюзных офісаў. Вось што паведаміў сёньня нашаму радыё прэзыдэнт Беларускага кангрэсу дэмакратычных прафсаюзаў Аляксандар Ярашук:

(Ярашук: ) “З гэтай нагоды мы напісалі адпаведны ліст генэральнаму пракурору Шэйману, дзе мы гаворым пра прававы нігілізм і што парушаны ўсе дзейныя законы, а таксама ўказы прэзыдэнта. І зараз чакаем пазытыўнай рэакцыі. Бо гэта незаконнае павелічэньне арэнднай платы, якое, па-першае, нічым не абгрунтаванае, а па-другое, гэта было зроблена без папярэдняга паведамленьня”.

Паводле Ярашука, распараджэньне старшыні Фэдэрацыі Леаніда Козіка тычыцца памяшканьняў, якія займаюць Беларускі кангрэс дэмакратычных прафсаюзаў, Свабодны прафсаюз, Свабодны прафсаюз мэталістаў і Дэмакратычны прафсаюз транспартнікаў. 5 студзеня яны мусілі былі альбо зьехаць з памяшканьня, альбо плаціць за арэнду да 10 эўра за 1 квадратны мэтар плошчы. Аднак на сёньняшні дзень ніводзін прафсаюз не падпарадкаваўся такім умовам. Гаворыць старшыня Свабоднага прафсаюзу Генадзь Быкаў:

(Быкаў: ) “Быў 1 эўра, зараз 10 эўра. Ёсьць указ прэзыдэнта Беларусі №495, дзе гаворыцца, што для грамадзкіх арганізацыяў і прафсаюзаў арэндная плата роўная 10% ад арэнды суб’ектаў гаспадараньня. Калі вось па Менску 10 эўра для фірмаў, то для прафсаюзаў 1 эўра. Галоўная мэта дзеянняў Фэдэрацыі — дэмакратычных прафсаюзаў не павінна быць. ФПБ, спадар Козік ставяць мэту, каб нас выжыць любымі сродкамі”.

Паводле прэзыдэнта Беларускага кангрэсу дэмакратычных прафсаюзаў Аляксандра Ярашука, у наступныя дні варта чакаць абвастрэньня “арэнднага” канфлікту з Фэдэрацыяй:

(Ярашук: ) “Спадар Козік будзе рабіць усё магчымае, каб нас выселіць. У тым ліку, я не выключаю і канкрэтных фізычных дзеяньняў”.
XS
SM
MD
LG