Лінкі ўнівэрсальнага доступу

МНОГІЯ МЕНЧУКІ КАЛЯДЫ СЬВЯТКУЮЦЬ ДВОЙЧЫ


Галіна Абакунчык, Менск

Многія мінакі заявілі, што яны дакладна прытрымліваюцца сямейных традыцыяў і сьвяткуюць, адпаведна, каталіцкія альбо праваслаўныя каляды.

(Карэспандэнтка: ) “Ці рыхтуецеся вы да сьвятаў?”

(Спадар: ) “Не рыхтуюся ні да тых, ні да тых, але неяк усё ж адзначаю. Падарункі нейкія, анёлкі купляю для родных”.

(Спадар: ) “Не сьвяткую ні 7-га, ні 25-га”.

(Спадар: ) “Не сьвяткуем увогуле мы Каляды, але падарункі робім. Вось купіў жонцы падарунак”.

Некаторыя мае суразмоўцы да Калядаў не рыхтуюцца ўвогуле, але да сьвята ставяцца з павагаю й нават набываюць падарункі.

(Карэспандэнтка: ) “Якія Каляды звычайна вы адзначаеце — 25 сьнежня, альбо 7 студзеня?”

(Спадарыня: ) “7 студзеня. Пасьля 1 студзеня пачынаю рыхтавацца”.

(Спадар: ) “Каляды каталіцкія, бо я каталік і жонка мая каталічка. Да цешчы едзем у Нясьвіж, там паставім елачку і пойдзем ноччу ў касьцёл”.

(Спадарыня: ) “Кожны свае адзначае. Мы праваслаўныя, дык адзначаем свае”.

(Карэспандэнтка: ) “Ці рыхтуецеся вы да сьвятаў?”

(Спадарыня: ) “Яшчэ як. Я ж каталічка, то стараюся захаваць усе традыцыі”.

(Спадарыня: ) “Канечне, рыхтуемся да 7 студзеня. Вось ужо падарункі пачала набываць”.

(Спадарыня: ) “Сёньня ў нас вігілійная вячэра, куцьця будзе. А заўтра будзе сьвята. І ўсіх каталікоў Беларусі я віншую з гэтым вялікам сьвятам”.

Некаторая частка сярод апытаных сёньня менчукоў казалі, што ахвотна сьвяткуюць Каляды двойчы.

(Спадарыня: ) “Мае продкі каталікі й праваслаўныя, таму мы адзначаем і 25 сьнежня, і 7 студзеня”.

(Спадарыня: ) “Мы адзначаем і 25-га і 7-га, але сёлета не рыхтуемся, бо ў доме рамонт і ў хаце развал”.

(Спадар: ) “Звычайна я сьвяткую і каталіцкія Каляды, і нашыя праваслаўныя, бо мой бацька быў напалову каталіком, а напалову праваслаўным. І елачку ставім, і гасьцей клічам, і ў царкву можам схадзіць”.

Пераважная бальшыня суразмоўцаў паведаміла, што яны абавязкова ўсталёўваюць у сваёй хаце елачку. Частка — выключна натуральную, а некаторыя — штучную.

(Карэспандэнтка: ) “Ці ставіце вы дома елачку й калі так, то штучную ці натуральную?”

(Спадар: ) “Часьцей за ўсё штучную, але сёлета, магчыма, і натуральную”.

(Спадарыня: ) “Абавязкова ставім елачку. Хацелася бы натуральную, але яе трэба пашукаць, набыць. Часу на гэта не заўсёды хапае, а таму ставім штучную”.

(Спадарыня: ) “Натуральную адназначна. Бо пах гэтай елачкі — ужо сьвята ў кватэры”.

(Спадар: ) “Натуральную, канечне, бо гэта ж водар”.

(Спадар: ) “Натуральную звычайна, бо хіба ад штучнай будзе такі водар?”

(Спадарыня: ) “Натуральную, па-першае, вельмі шкада. Па-другое, у мяне ўжо некалькі гадоў штучная — я яе й стаўлю”.

(Спадар: ) “Калі кожны будзе высякаць натуральную елачку, то хутка іх не застанецца зусім”.
XS
SM
MD
LG