Лінкі ўнівэрсальнага доступу

logo-print

МЕНСК СПАДЗЯЕЦЦА ПАДПІСАЦЬ ДАМОВУ ПРА НОВЫ МАНДАТ МІСІІ АБСЭ ДА КАНЦА ГОДУ


Валер Каліноўскі, Менск

Намесьнік міністра замежных справаў Беларусі Аляксандар Сычоў зазначыў, што магчымасьць для падпісаньня дамовы з АБСЭ пра новы мандат місіі не абмяжоўваецца гэтым тыднем, і таму, на ягоную думку, калядныя вакацыі ня будуць перашкодай для дасягненьня посьпеху на перамовах у Вене.

У штаб-кватэры АБСЭ цяпер знаходзяцца памочнік А.Лукашэнкі ў міжнародных справах Ігар Ляшчэня, які кіруе беларускай дэлегацыяй, амбасадар у асаблівых даручэньнях Андрэй Грынкевіч і начальнік аддзелу МЗС Беларусі па працы з АБСЭ Максім Рыжанкоў.

У беларускім замежнапалітычным ведамстве атрымалі паведамленьне зь Вены пра ўчорашнюю няўдалую спробу зацьверджаньня новага мандату місіі на паседжаньні Сталай Рады АБСЭ, якую заблякавалі дэлегацыі ЗША і Канады.

Аднак гэта не зьбянтэжыла МЗС Беларусі. Гаворыць намесьнік начальніка інфармацыйнай управы МЗС Андрэй Савіных:

(Савіных: ) “Справа ў тым, што дыскусія яшчэ працягваецца. Пазыцыя ЗША і Канады. Такім чынам, працэс перамоваў ідзе”.

Камэнтаваць сутнасьць спрэчных пунктаў, якія сарвалі пагадненьне, Андрэй Савіных адмовіўся, як адмовіўся і камэнтаваць пазыцыі асобных краінаў.

Калі будзе дасягнутае пагадненьне, у МЗС казаць пакуль не бяруцца. Магчыма, гэта адбудзецца нават сёньня, магчыма, пазьней. Прынамсі, тэрмін камандзіроўкі трох беларускіх дыпляматаў на перамовы ў Вену пакуль што разьлічаны да канца гэтага году.
XS
SM
MD
LG