Лінкі ўнівэрсальнага доступу

ВІКТАР ІВАШКЕВІЧ ПАЕДЗЕ НА “ХІМІЮ” Ў БАРАНАВІЧЫ


Любоў Лунёва, Менск

Распараджэньне Віктар Івашкевіч атрымаў праз тры месяцы пасьля прысуду. Нагадаем, рэдактара газэты “Рабочы” Першамайскі суд Менску пакараў абмежаваньнем волі на два гады за публікацыю артыкула “Злачынца павінен сядзець у турме”, надрукаванага падчас прэзыдэнцкай выбарчай кампаніі. Пракуратура палічыла, што ў гэтым артыкуле ўтрымліваўся паклёп на Лукашэнку і ягонае атачэньне. Гаворыць Віктар Івашкевіч:

(Івашкевіч: ) “Яны маглі гэта зрабіць і раней, маглі б і пазьней, але зрабілі зараз. Чаму быць, таго не мінаваць. Я хацеў, калі куды й ехаць за выключэньнем Менску, так у гэтыя Баранавічы. Там вельмі разьвітая грамадзкая супольнасьць, незалежная прэса, партыі й прафсаюзы. Гэта адзін з дэмакратычных цэнтраў Беларусі. Там мне будзе камфортна. Я думаю, што адтуль я буду ня менш актыўна ўдзельнічаць у грамадзкім жыцьці, як і цяпер. Ну, прынамсі, ня менш актыўна, як сябра БНФ ад гораду Баранавічы. Мне не абмяжоўваюць перамяшчэньне. Я буду мець вольны выхад у горад. Пасьля працы буду мець некалькі гадзінаў на дзень, каб зайсьці пасьля працы ў штаб БНФ ці ў рэдакцыю газэтаў — далучыцца да грамадзкай дзейнасьці”.

Віктар Івашкевіч яшчэ ня ведае, дзе яму прыйдзецца працаваць.

(Івашкевіч: ) “Я пакуль ня ведаю, куды мяне накіруюць. Яны могуць даць мне магчымасьць самому шукаць месца. У Баранавічах ёсьць дзьве незалежныя газэты, дзе рэдактарамі працуюць сябры Беларускай асацыяцыі журналістаў. Яны, я мяркую, мне дапамогуць. Я магу ў газэце працаваць вартаўніком, альбо кур’ерам. У іх там сетка распаўсюджваньня сваіх газэт, дзе яны ходзяць па кватэрах і раздаюць газэты, вельмі зручная падчас выбарчай кампаніі”.

Віктару Івашкевічу дагэтуль так і не абвесьцілі амністыю. Хутчэй за ўсё, на “хіміі” яму прыйдзецца правесьці не адзін год, як спадзяваліся адвакаты, а ўвесь тэрмін — два гады.

Рэдактар газэты “Рабочы” — ужо трэці беларускі журналіст, які трапіў сёлета на “хімію” за паклёп на Лукашэнку. Акрамя яго, адбываюць пакараньне журналісты газэты “Пагоня” Павал Мажэйка і Мікола Маркевіч.
XS
SM
MD
LG