Лінкі ўнівэрсальнага доступу

У ЦЭНТРЫ МЕНСКУ — НАШЭСЬЦЕ ПАЦУКОЎ


Любоў Лунёва, Менск

У цэнтры прафдэзінфэкцыі Савецкага раёну Менску паведамілі, што, сапраўды, гэтая тэрыторыя і раней лічылася небясьпечнай. Апошнім часам адміністрацыя Камароўскага рынку робіць усе неабходныя захады, каб на ягонай тэрыторыі не было пацукоў. Таму грызуны пачалі асвойваць тэрыторыю заводу вылічальнай тэхнікі й жылых дамоў, прылеглых да тэрыторыі рынку. Намесьніца галоўнага лекара цэнтру прафдэзінфэкцыі Ала Чарняўская паведаміла Радыё Свабода:

(Чарняўская: ) “Завод вылічальнай тэхнікі ня здольны нам плаціць ні па заяўкавай сыстэме, ні па дамоўленасьці. Яны нават прапанавалі нам нейкі бартэр, але што яны могуць нам прапанаваць? Пацукі там жывуць і множацца. Пацукі адтуль ідуць у жылыя дамы. Акрамя таго, небясьпечна яшчэ і тое, што яны маюць кляшчоў.

Дамы на вуліцах Куйбышава і Багдановіча пабудаваныя на балоце. Санітарная сытуацыя там жудасная. Дамы асядаюць, зьяўляюцца дзіры, і гэта вельмі зручна для пацукоў. Мы з гэтым змагаемся. Яны множацца ў сьмецьцеправодах і ў падвалах. Трэба гэтым займацца ЖЭСу №49. У ЖРЭА была грашовая запазычанасьць, таму мы летам спынілі працу і, канечне, колькасьць пацукоў значна павялічылася.

Мы ўсё робім, што ад нас залежыць. Мы распаўсюджваем атруту вострага і кумулятыўнага ўзьдзеяньня, калі пацукі паміраюць цягам дзесяці дзён. У гэтым раёне сытуацыя ў жылых дамах вельмі кепская. Пацукі начныя жывёлы і, калі яны ўжо ўдзень ходзяць па пад’ездах, то нічога добрага ў гэтым няма”.

У ЖЭСе №49 нам паведамілі, што сытуацыя пакуль кантралюецца. Але адмыслоўцы лічаць, што большая небясьпека для людзей зыходзіць не столькі ад саміх пацукоў, колькі ад кляшчоў, якіх пераносяць гэтыя пацукі.
XS
SM
MD
LG