Лінкі ўнівэрсальнага доступу

logo-print

У МАСКВЕ РАСПАЧАЛА ПРАЦУ КОНКУРСНАЯ КАМІСІЯ Ў СПРАВЕ ГІМНУ САЮЗУ РАСЕІ Й БЕЛАРУСІ


Ігар Карней, Менск

Напісаньне гімну саюзнай дзяржавы сёлета ў красавіку ініцыяваў дзяржаўны сакратар саюзу Расеі й Беларусі Павал Барадзін. Дагэтуль перад паседжаньнямі саюзнага парлямэнту гучаў гімн СССР, але пасьля таго, як Расея пакінула музыку Аляксандрава ў якасьці цяперашняга дзяржаўнага гімну, прыхільнікі інтэграцыі засталіся без фанфараў.

Ад красавіка больш за сотню аўтараў даслалі ў Маскву свае варыянты музычных і вершаваных твораў. Сярод іх і кампазытар Ігар Лучанок. У яго варыяцыяў некалькі: у хаўрусе з паэтамі Осеневым (творчы псэўданім колішняга “гэкачэпіста” Анатоля Лук’янава), Дабранрававым і іншымі. Паколькі Лучанок уваходзіць у склад адмысловага журы, шанцы на посьпех ацэньвае як рэальныя. Але лічыць, што вынік будзе агучаны значна пазьней.

(Лучанок: ) “Пытаньне гімну складанае. Памятаеце, як цяжка ствараўся гімн Савецкага Саюзу, потым гімн Расеі. Колькі было варыянтаў! — а перамагла музыка Аляксандрава — та-дай-пам-па-рай-рай і г.д. Колькі было спрэчак вакол гімну Беларусі! Таму казаць, што сёньня выберуць гімн, ня варта. Гэта працяглы працэс; патрэбная нармалёвая мэлёдыя, нармалёвыя вершы. Тым больш, што ў гэтым бралі ўдзел як самадзейныя аўтары, так і прафэсійныя”.

Апроч Лучанка, у конкурснай камісіі задзейнічаны зь беларускага боку міністар інфармацыі Міхаіл Падгайны і старшыня Дзяржтэлерадыёкампаніі Ягор Рыбакоў. Інтарэсы Расеі прадстаўляюць уласна Генадзь Селязьнёў, Мікіта Міхалкоў, Іосіф Кабзон. Паказальна, што тэксты прымаюцца выключна па-расейску.

Ужо вядома пра некаторыя дзіўныя тандэмы. Так, крыніцы ў камісіі паведамілі, што паступіла сумесная праца ў зьвязку Чаргінец-Гамзатаў. Зусім нечаканы тандэм поп-кампазытара Аркадзя Ўкупніка і сьпевака Льва Лешчанкі. А вось лідэр гурту “Сябры” Анатоль Ярмоленка прызнаўся, што некалькі месяцаў таму ўжо запісваў адзін з варыянтаў разам з расейскім опэрным выканаўцам Мікалаем Баскавым.

(Ярмоленка: ) “Якім будзе саюз — пакуль невядома, і таму я не магу сказаць, які мусіць быць гімн. Прынамсі, упэўнены, што ўсё адбудзецца няхутка. Да таго ж, зь якой пазыцыі зыходзіць — музычнай альбо палітычнай? Мяркую, патрэбнае нейкае кампраміснае рашэньне”.

(Карэспандэнт: ) “Калі будзе прапанова выканаць канчатковы варыянт гімну, вы дасьцё згоду?”

(Ярмоленка: ) “Я прафэсіянал. Калі гэта будзе цікава і будзе адпавядаць маёй грамадзянскай пазыцыі, я выканаю. Я браў удзел у падобным праекце: гэта быў запіс песьні Лучанка на вершы Дабранравава аб сяброўстве Расеі й Беларусі. Калі будзе прапанова, не выключаю: мне гэта можа быць цікава”.

Свае музычныя варыянты даслалі ў Маскву і іншыя прафэсійныя кампазытары — Эдуард Зарыцкі, Леанід Захлеўны, Валеры Іваноў, Эдуард Ханок ды іншыя. Што тычыцца ўдзелу беларускіх паэтаў, то ў Саюзе пісьменьнікаў сказалі, што гэта справа асабістая, але ніхто аб сваім удзеле ў праекце не распавядаў.

А вось што думае наконт неабходнасьці аднаго з атрыбутаў віртуальнай дзяржавы Сяргей Законьнікаў:

(Законьнікаў: ) “Сьмяюся над гэтым усім: над саюзнымі дзяржавамі, гімнамі, астатняй дуратой. Шчыра скажу: мяне саюз Беларусі з Расеяй не цікавіць ніколькі. Мяне цікавіць мая Беларусь і паасобку — Расея. У цэлым, разам яны мяне зусім не цікавяць. Таму што гэта абракадабра; тое самае, што вярблюда аб’яднаць з роварам. Зрэшты, мне не цікавы і цяперашні беларускі гімн. Сьмешна робіцца, калі на беларускім радыё абвяшчаюць: аўтар словаў Карызна, музыка Сакалоўскага. Клімковіча як быццам і не было. Карызна нейкія тры дурныя словы ў дурны тэкст усунуў, а цяпер афішуецца як аўтар словаў. Няма дзяржавы. Вось ужо восем гадоў у нас вар’яцкі дом”.

Паводле рэглямэнту конкурсу, апошняе слова на карысьць таго ці іншага варыянту гімну саюзнай дзяржавы павінен сказаць старшыня Вышэйшага дзяржаўнага савету. Зараз гэту пасаду займае Аляксандар Лукашэнка.
XS
SM
MD
LG