Лінкі ўнівэрсальнага доступу

СВАЯКІ ЗЬНІКЛЫХ ЗАЎТРА ЗЬБІРАЮЦЦА НА КАСТРЫЧНІЦКАЙ ПЛОШЧЫ МЕНСКУ


Алег Грузьдзіловіч, Менск

Заўтра адзначаецца міжнародны Дзень правоў чалавека. 10 сьнежня 1948 году на сэсіі Арганізацыі Аб’яднаных Нацыяў была прынятая Дэклярацыя правоў чалавека, і з таго часу менавіта ў гэты дзень ва ўсім сьвеце штогоду праводзяцца акцыі ў абарону правоў людзей.

У Менску на Кастрычніцкай плошчы а 12-й гадзіне зьбяруцца сваякі зьніклых палітыкаў, праваабаронцы, тыя людзі, хто не абыякавы да становішча з правамі чалавека ў Беларусі. На сустрэчу жонкі зьніклых апазыцыянэраў заклікалі прыйсьці сваіх сяброў, аднадумцаў, тых, хто добра ведаў Юрыя Захаранку, Віктара Ганчара, Анатоля Красоўскага, Зьмітра Завадзкага.

Зінаіда Ганчар перакананая, што на плошчу варта прыйсьці і асобам, якія прадстаўляюць сёньняшнюю ўладу. На думку Зінаіды Ганчар, гэтыя людзі таксама мусяць клапаціцца пра тое, каб ў Беларусі ніколі не зьнікалі людзі.

(Ганчар: ) “Бо ўчора былі скрадзеныя нашыя мужы, а заўтра могуць быць скрадзеныя гэтыя людзі — тыя, хто сёньня працуе на ўладу, і, верагодна, ведае шмат сакрэтаў гэтай улады. Таму, мяркую, яны павінны стаць побач з намі й гэтым абараніць ня толькі нас, але сябе і свае сем’і”.

Але больш за ўсё Зінаіда Ганчар спадзяецца бачыць заўтра на плошчы выбарцаў з Васьняцоўскай і Коласаўскай выбарчых акругаў, якія абіралі Віктара Ганчара дэпутатам Вярхоўнага Савету 12 і 13 скліканьняў. З кожным з гэтых людзей яна будзе радая асабіста сустрэцца і паразмаўляць.

На думку жонкі зьніклага бізнэсоўца Анатоля Красоўскага Ірыны, тыя, хто плянаваў выкраданьні вядомых палітыкаў, разьлічваў яшчэ і запалохаць астатніх грамадзянаў. “Калі людзі баяцца, яны перастаюць ня толькі змагацца, але і спачуваць ды дапамагаць адзін аднаму. Гэта вельмі небясьпечны стан грамадзтва”, — папярэджвае Ірына Красоўская.

(Красоўская: ) “Людзі скрадзеныя, ніхто ня ведае, дзе яны, і гэта ёсьць своесаблівым псыхалягічным ціскам на астатніх грамадзянаў гэтай краіны, бо кожны задумваецца над іхным лёсам і прымярае яго да сябе”.

І ўсё ж Ірына Красоўская перакананая, што жыхары Менску здольныя пераадолець свой страх. “Разам мы здолеем перадолець такую трагедыю Беларусі, як выкраданьне людзей”, — кажа Ірына Красоўская.
XS
SM
MD
LG