Лінкі ўнівэрсальнага доступу

У РАЎБІЧАХ ПАЧАЛАСЯ КАНФЭРЭНЦЫЯ “МІЖНАРОДНЫЯ СТАНДАРТЫ ДЭМАКРАТЫЧНЫХ ВЫБАРАЎ І БЕЛАРУСКАЕ ВЫБАРЧАЕ ЗАКАНАДАЎСТВА”


Альгерд Невяроўскі, Менск

У канфэрэнцыі, якую арганізаваў праваабарончы цэнтар “Вясна”, бяруць удзел каля 100 прадстаўнікоў апазыцыйных партыяў, грамадзкіх арганізацыяў, дэпутаты палаты прадстаўнікоў, а таксама госьці з Нарвэгіі, Вугоршчыны, Польшчы, Літвы й Расеі. Пра мэты гэтый канфэрэнцыі распавядае кіраўнік “Вясны” Алесь Бяляцкі:

(Бяляцкі: ) “Нашая мэта — абмеркаваць сытуацыю з выбарчым заканадаўствам, прычым без прывязкі непасрэдна да мясцовых выбараў, якія ўжо пачаліся, а з пэрспэктывай, са спадзяваньнем, што нейкія зьмены ў гэтым заканадаўстве адбудуцца й яно будзе палепшанае. Мы, безумоўна, ня маем ілюзіяў, што гэтыя зьмены адбудуцца заўтра ці пазаўтра, але тым ня менш, гэтая праблема ёсьць, яна набалелая праблема, і нашая задача — паставіць гэтае пытаньне перад уладай”.

Замежныя госьці гавораць, што мэта іх удзелу ў канфэрэнцыі — спрыяць таму, каб беларускія ўлады прыслухаліся да іхных прапановаў і пачалі рухацца ў бок дэмакратызацыі заканадаўства. Але пакуль яны сумняюцца, што афіцыйны Менск хоча ў гэтай справе хоць нешта зьмяніць. Не спрыяе даверу замежных экспэртаў да беларускіх уладаў і тое, што яны адмовіліся выдаць візы ўдзельнікам гэтай канфэрэнцыі Адрыяну Марару з Румыніі й Робэрту Баху з Чэхіі.

Гаворыць кіраўнік місіі БДІПЧ АБСЭ ў справе назіраньня за выбарамі ў шэрагу эўрапейскіх краінаў, нарвэжац Карэ Волан:

(Волан: ) “Быў вельмі працяглы працэс, калі міжнародная супольнасьць давала ацэнку выбарчаму заканадаўству Беларусі. Але, на жаль, беларускія ўлады не прыслухаліся да парадаў міжнародных арганізацыяў. Вельмі шкада, што двух нашых калегаў, чэха і румына, не пусьцілі на гэтую канфэрэнцыю, і гэта паказьнік таго, што ў беларускіх уладаў няма добрай волі, каб пачаць працэс пераменаў. Але мне здаецца, што нам трэба засяродзіцца на нашай тэме і даць слушныя парады, якім чынам можна зьмяніць як выбарчае заканадаўства, так і практыку яго выкананьня”.

Нарвэскі госьць лічыць, што беларускім уладам трэба даць шанец памяняць падыходы да выбарчых дэмакратычных стандартаў.

Прадстаўнік “Асацыяцыі арганізатараў выбараў краінаў Цэнтральнай і Ўсходняй Эўропы” Іштван Кёсэгі з Вугоршчыны летась назіраў у Беларусі за прэзыдэнцкімі выбарамі й лічыць, што з таго часу ў падыходах уладаў да праблемы дэмакратызацыі заканадаўства мала што зьмянілася. Аднак ён мяркуе, што працу варта працягваць:

(Кёсэгі: ) “Беларускія ўлады не ізаляваныя ад Эўропы, і яны таксама мусяць разумець, што некаторыя крокі абавязкова трэба рабіць, каб вырашаць гэтыя праблемы”.

Дэпутат Палаты прадстаўнікоў Іван Пашкевіч перакананы, што ўлады ня пойдуць на дэмакратызацыю заканадаўства, але заклікаў апазыцыйныя партыі браць удзел у выбарах, каб хоць неяк уплываць на грамадзтва. Удзельнікі канфэрэнцыі выпрацуюць свае прапановы ў справе зьмены выбарчага закону. Дэпутат Валер Фралоў абяцаў перадаць іх на разгляд у Палату прадстаўнікоў.
XS
SM
MD
LG