Лінкі ўнівэрсальнага доступу

ЗАКОНЧЫЎСЯ ПЕРШЫ ЭТАП ВЫБАРЧАЙ КАМПАНІІ


Уладзімер Глод, Менск

На думку намесьніка старшыні Аб’яднанай грамадзянскай партыі Сяргея Альфера, самай адметнай рысай першага этапу кампаніі стала патрабаваньне ўладаў даведак пра тое, ці маюць кандыдаты ў сябры камісіі досьвед адпаведнай працы. Падчас мінулых выбарчых кампаніяў чыноўнікі рознымі спосабамі перашкаджалі ўключэньню ў камісіі партыйных актывістаў, таму сярод іх няшмат асобаў з такім досьведам. Гэта, на думку спадара Альфера, можа мець сур’ёзныя наступствы.

(Альфер: ) “Ёсьць ужо пэўныя сыгналы, калі супрацоўнікі выканкамаў шчыра гавораць, што будуць пры фармаваньні камісіяў улічваць, маюць ці не кандыдаты адпаведны досьвед. Напэўна, у сувязі з гэтым Цэнтарвыбаркам і ўвёў новую форму, у якой зьявіўся запіс “удзельнічаў ці не папярэдне ў рабоце выбарчых камісіяў?” Гэта па-за законам. І, дарэчы, Аб’яднаная грамадзянская партыя ўчора прыняла адмысловую заяву з гэтай нагоды. Мы лічым, што пачынаецца наступны этап парушэньняў асноўных правоў грамадзянаў на свабодныя і справядлівыя выбары. І што гэтыя выбары, хутчэй за ўсё, будуць такімі ж, як і папярэднія”.

Адной зь першых пачала рыхтавацца да выбараў Беларуская сацыял-дэмакратычная партыя “Народная грамада”. Паводле намесьніка кіраўніка партыі Віталя Малашкі, у выбарчыя камісіі ўжо прапанавана каля 80 прыхільнікаў Грамады — хто непасрэдна ад партыі, хто праз збор подпісаў. Я пацікавіўся ў спадара Малашкі, ці зафіксаваныя выпадкі, калі выканкамы адмаўляліся рэгістраваць заявы кандыдатаў у сябры выбарчай камісіі.

(Малашка: ) “Яшчэ няма. Зараз усе лісты прымаюцца. А фармаваньне камісіяў будзе 7–8 сьнежня. Тады будуць паседжаньні выканкамаў. Мы больш за 80 чалавек вылучылі — паглядзім, які працэнт зь іх пройдзе”.

Сёньня ўвечары скончылася вылучэньне сяброў толькі тэрытарыяльных камісіяў. У акруговыя камісіі, якія будуць займацца выбарамі дэпутатаў абласных і менскіх раённых саветаў, якія маюць статус акруговых, вылучэньне яшчэ працягваецца.
XS
SM
MD
LG