Намесьнік старшыні міжнароднай камісыі палаты прадстаўнікоў Сяргей Касьцян гаворыць, што ня можа паверыць, каб Краўчанка сам пайшоў на такі крок. Паводле Касьцяна, некалькі месяцаў таму ён сустракаўся з Краўчанкам і той, ведаючы, што ягоны амбасадарскі тэрмін сканчаецца, казаў, што пойдзе на любую працу і гатовы паслужыць Бацькаўшчыне.
Былы намесьнік міністра замежных справаў Андрэй Саньнікаў лічыць сытуацыю з Краўчанкам знакам зьменаў у беларускім грамадзтве. Краўчанка заўсёды быў флюгерам, які паказвае, у якім кірунку пойдуць зьмены.
Былы амбасадар Беларусі ў Латвіі Міхаіл Марыніч пры ацэнцы учынка Краўчанкі раіць улічваць багатае і разнастайнае палітычнае мінулае былога кіраўніка беларускай амбасады ў Токіё.
(Марыніч: ) “Уцёк дык уцёк, што вы перажываеце за яго? Быў бы патрыётам, вярнуўся б дадому і дапамагаў бы, схіліў бы галаву перад апазыцыяй. Ён жа здрадзіў апазыцыю, быў падабраны ўладаю”.
На думку Міхаіла Марыніча цяперашняя няпэўнасьць і супярэчлівасьць паведамленьняў мае вельмі простае тлумачэньне – амэрыканскі бок вывучае зварот Краўчанкі аб прадастаўленьні палітычнага прытулку.
(Марыніч: ) “Сёньня ідзе вывучэньне гэтай асобы, вывучэньне і ягонай палітычнай ролі, і ягонага ранейшага і цяперашняга статусу. Сёньня зроблены крок зь ягонага боку , але ня зроблены крок з другога боку”.
На думку старшыні Аб’яднанай грамадзянскай партыі Анатоля Лябедзькі ў, так бы мовіць, зьнікненьні Пятра Краўчанкі няма аніякай палітычнай подбіўкі. Лябедзька ня верыць у апазыцыйнасьць былога амбасадара ў Японіі: “Краўчанка зрабіў свой палітычны выбар і ня можа быць ворагам ўлады”.
Кіраўнік цэнтру інфармацыі і грамадзкіх сувязяў КГБ Фёдар Котаў абмежаваўся кароткай рэплікаю: “У адносінах Пятра Краўчанкі мяне нішто ня можа зьдзівіць, у нашай краіне заўжды хапала пярэваратняў”.
Дэпутат палаты прадстаўнікоў Іван Пашкевіч, наадварот, лічыць, што рашэньне Краўчанкі мела выключна палітычныя матывы. Былы намесьнік адміністрацыі прэзыдэнта прыгадаў, што ў свой час прызначэньне Краўчанкі амбасадарам у Японію мела спэцыфічны характар і адбывалася падчас актыўнага дыялёгу і распрацоўкі фармату прысутнасьці ў Беларусі назіральнай групы АБСЭ.
