Сыноптыкі Белгідрамэтцэнтру кажуць, што тэмпэратура паветра гэтымі днямі на 4–11 градусаў ніжэйшая за норму, аднак тое ня ёсьць нечым надзвычайным. Тым ня менш, усяго за два выходныя толькі ў Менску ў шпіталь хуткай дапамогі патрапілі дзевяць чалавек з прычыны моцнага абмаражэньня. Прычынай ёсьць празьмернае ўжываньне алькаголю, якое набыло незвычайны размах, — кажа траўматоляг Валянцін Машэль.
(Машэль: ) “Кожны год народ п’е гарэлку, зводкі не чытае. Калі цёпла, то адляжыцца, прасьпіцца і пайшоў. А калі мароз, то, натуральна, абмарожваецца. Вось, як толькі зь пятніцы пайшло паніжэньне тэмпэратуры, адразу пайшлі абмаражэньні”.
Аднак найбольш распаўсюджанымі няшчаснымі выпадкамі, зьвязанымі з рэзкім пахаладаньнем, ёсьць пажары. Хаты вяскоўцаў — пераважна пэнсійнага веку — гараць ад зношаных печаў, а гараджане церпяць ад сапсаваных электрапрыладаў, якімі спрабуць нагрэць сваё жытло. Так, за два дні ў краіне здарылася 155 пажараў, ёсьць ахвяры, — кажа дзяжурны МНС.
(Дзяжурны: ) “Шмат сьмерцяў на пажарах, і гэта з пахаладаньнем зьвязана. Хто печ распальваў, хто нейкімі ацяпляльнымі прыборамі саграваўся. Прасьцей за ўсё, лічыце, што з прычыны абагравальнікаў”.
У Міністэрстве жыльлёва-камунальнай гаспадаркі ня схільныя зьвязваць пажары з холадам у кватэрах. Паводле намесьніка міністра Мікалая Ліпеня, калі тэмпэратура й заніжаецца, дык толькі ў адміністрацыйных памяшканьнях і, магчыма, на выходныя дні, што залежыць ад платаздольнасьці суб’екту гаспадараньня. У кватэрах жа менш за 18 градусаў не бывае, — сьцьвярджае спадар Ліпень.
(Ліпень: ) “У кватэры павінна быць 18 градусаў. Калі ўсталяваная такая тэмпэратура, мы павінныя забясьпечыць падачу цепланосьбіта. Прычым тут мароз альбо не мароз?”
Аднак нават у сталіцы, дзе камунальныя службы працуюць, нібыта, найбольш адказна, некаторыя менчукі ня згодныя з чыноўніцкімі заявамі.
(Спадарыня: ) “Халодна. У нас халодна”.
(Спадар: ) “Нармалёва”.
(Спадарыня: ) “На праспэкце Скарыны мы жывем, што насупраць бібліятэкі, якая будуецца, — у нас вельмі халодна, 12–14 градусаў”.
(Спадарыня: ) “Халодна ў кватэры вельмі. Прыкладна градусаў 15–16. Цёпла апранаемся й усё”.
Паводле сыноптыкаў Беларускага гідрамэтцэнтру, у наступныя два дні пройдзе сьнег, і холад крыху адступіць. Але ўжо ў другой палове тыдня мароз узмоцніцца ізноў.