Аляксандар Конеў праходзіў лячэньне ў мэдычнай часьці Магілёўскага вытворчага аб’яднаньня “Хімвалакно”, у аддзяленьні кардыялёгіі. Паводле інфармацыі з крыніцаў, якія заслугоўваюць даверу, мэдыкаў хвалявалі нюансы хваробы гэтага пацыента.
Раніцай Аляксандар Конеў меў гутарку з дактарамі, пасьля чаго яго адправілі ў пакой. Ён не дайшоў да яго, разьбегся па калідоры, скочыў у акно і ўпаў разам са шклом зь сёмага паверха.
Супрацоўнікі шпіталю гавораць, што і раней былі здарэньні, калі людзі выкідваліся з акна — з прычыны алькагольнай гарачкі. Аднак асоба ваеннага камісара вобласьці не ўкладаецца ў такую схему. Мэдыкі схіляюцца да суіцыду, які быў зьдзейсьнены ў стане афэкту.
Здарэньне адбылося раніцай, паміж 10-й і 11-й гадзінамі. Пасьля гэтага, паводле сьведчаньня супрацоўнікаў магілёўскага шпіталю, іх установа і подступы да яе нагадвалі ім тэлевізійныя трансьляцыі захопу закладнікаў мюзыклу “Норд-Ост”.
Аляксандру Коневу, які нядаўна быў прызначаны ваенным камісарам Магілёўскай вобласьці, было 43 гады.
