Лінкі ўнівэрсальнага доступу

ЦІ ВАРТА ПУСКАЦЬ АЛЯКСАНДРА ЛУКАШЭНКУ Ў ЭЎРОПУ?


Галіна Абакунчык, Менск

Меркаваньні маіх сёньняшніх суразмоўцаў умоўна падзяліліся на тры групы. Самымі нешматлікімі сярод іх былі тыя, хто казаў, што пытаньне выдачы візаў прадстаўнікам уладных структураў Беларусі Эўразьвяз мусіць вырашыць станоўча.

(Спадар: ) “Я ведаю, што Захад ніколі ня быў нашым сябрам. Але ж трэба жыць у міры, трэба наладжваць сувязі. І я вельмі спадзяюся, што гэтае пытаньне будзе вырашанае самым станоўчым чынам”.

Іншая частка мінакоў на пытаньне — як яны ставяцца да магчымай забароны на ўезд у краіны Эўразьвязу Лукашэнкі й іншых беларускіх чыноўнікаў — казалі, што ім вельмі складана адказаць на гэтае пытаньне. Аднак усё ж яны больш схільныя падтрымаць гэтую ідэю.

(Спадар: ) “Цяжка сказаць правільна гэта альбо не, але я лічу, што ягоная палітыка няправільная ні ў дачыненьні Расеі, ні краінаў Эўропы”.

(Спадарыня: ) “Адназначна й не адкажаш. Але перад усімі так выказвацца таксама нельга, выскокваць наперад — непрыстойна так паводзіць сябе чыноўніку такога высокага ўзроўню”.

(Спадар: ) “Пэўна, заслугоўваем такіх адносінаў — я нават і ня ведаю. Хто што заслужыў, няхай кожны тое й атрымае”.

І большасьць сярод апытаных сёньня менчукоў заявіла, што вельмі шкадуе аб пэрспэктыве мараторыю для Лукашэнкі й іншых высокіх афіцыйных асобаў на ўезд у шэраг краінаў Эўропы. Аднак падтрымліваюць гэтую ідэю, бо перакананыя, што ўлады Беларусі самі вымушаюць Эўразьвяз рабіць гэткія крокі.
(Спадар: ) “Вельмі дрэнна, вяджома. Мы эўрапейская краіна, і нельга, каб быў мараторый на ўезд чыноўнікаў. Але, канечне ж, патрэбна нешта зьмяняць у нашай палітыцы”.

(Спадар: ) “Правільна робяць. Каб ён паводзіў сябе крыху лепш, а так ён выказваецца, а горш робіцца для ўсёй краіны. Пакуль толькі чыноўнікам, але хутка й усёй Беларусі: ня будзе інвэстыцыяў, будзе горш людзям. Ну, зразумела — ізаляцыя”.

(Спадар: ) “Я ня думаю, канечне, што ізаляцыя нешта дасьць, але гэта адказ на палітыку, якую мы праводзім. Мы атрымліваем тое, што заслужылі за сем гадоў”.

(Спадарыня: ) “Чыноўнікам, дык можна й ня ўсім езьдзіць. Бо занадта шмат езьдзяць і толькі грошы расходуюць, а хлеб вунь які дарагі”.

(Спадар: ) “Горка й крыўдна, што нашых чыноўнікаў нікуды ня хочуць пускаць. А зь іншага боку, нашая краіна не заслугоўвае той улады, якая ёсьць цяпер”.

(Спадар: ) “Беларускія ўлады яшчэ ня хутка пачнуць удзельнічаць у падзеях міжнароднага значэньня. Спачатку патрэбна, каб спачатку адбыліся зьмены ў палітычнай сыстэме тут, у краіне”.

(Спадарыня: ) “Агідна тое, што нас не прымае ўвесь сьвет. Але я не падтрымліваю палітыку нашага кіраўніцтва”.

(Спадар: ) “Для іміджу нашай краіны гэта ня вельмі добра, але ў сёньняшняй палітычнай сытуацыі гэта вымушаны крок з боку эўрапейскай супольнасьці. Беларускія ўлады самі сябе загналі ў кут, самі сябе загналі ў ізаляцыю”.


XS
SM
MD
LG