Лінкі ўнівэрсальнага доступу

БЕЛАРУСЬ АДКЛІКАЛА СВАЙГО АМБАСАДАРА З ПРАГІ


Валер Каліноўскі, Менск

Рашэньне МЗС Чэхіі адмовіць А.Лукашэнку ў візе на саміт НАТО міністар замежных сваваў Беларусі Міхаіл Хвастоў назваў беспрэцэдэнтным і палітызаваным:

(Хвастоў: ) "Адмова чэскага боку ў выдачы візаў дэлегацыі Рэспублікі Беларусь, якая едзе на мерапрыемсва не зьвязанае з двухбаковымі адносінамі, я з падобным упершыню сутыкаюся ў дыпляматычнай практыцы і ў гісторыі міжнародных адносінаў. Аднак пад ціскам ЗША, як нам паведамілі нашыя сябры з Эўропы, чэскі бок ня здолеў прыняць уласнае рашэньне".

Міхаіл Хвастоў зазначыў, што ўзровень дэмакратыі ў іншых краінах, якія бяруць удзел у саміце Рады Эўраатлянтычнага партнэрства, не заўсёды вышэйшы, чым у Беларусі. Ён заявіў, што “Беларусь не пакіне без увагі выклік, які кінула Чэхія", і цяпер МЗС распрацоўвае шэраг захадаў у адказ.

Першы зь іх быў прадпрыняты ўжо сёньня ўвечары. Гаворыць прэсавы сакратар МЗС Павал Латушка:

(Латушка: ) "У сувязі з прынятым апошнім рашэньнем чэскага боку аб нявыдачы візаў беларускай дэлегацыі для ўдзелу ў паседжанні СЭАП, МЗС Беларусі сёньня ўвечары прыняў рашэньне аб адкліканьні амбасадара Беларусі ў Чэхіі ў Менск для кансультацыяў."

У Аляксандра Лукашэнкі, відаць, і не было пэўнасьці, што ён атрымае магчымасьць наведаць саміт НАТО і Рады Эўраатлянтычнага партнэрства.

На пачатак другой дэкады лістапада ў яго загадзя было заплянаванае іншае падарожжа - афіцыйны візыт у Кыргызстан.

Рашэньне Прагі, прынятае пры падтрымцы дзяржаваў НАТО, а таксама паведамленьне, што ў наступны панядзелак Эўразьвяз разгледзіць пытаньне пра забарону выдачы візаў ва ўсе краіны ЭЗ для А.Лукашэнкі і 50 высокіх кіраўнікоў Беларусі, сьведчыць пра тое, што Беларусь стала дзяржавай, якую не паважаюць у сьвеце, - лічаць апазыцыйныя палітыкі. Гаворыць Станіслаў Багданкевіч:

(Багданкевіч: ) "Калі і будуць закручаныя гайкі, то гэта будуць часовыя захады з боку ўлады, гэтая ўлада аганізуе . Я думаю, што гэта паскорыць працэс палітычных пераменаў".

Спадар Багданкевіч спадзяецца, што і атачэньне Лукашэнкі, і ягоны электарат скарэктуюць свае пазыцыі, і гэтая сытуацыя пойдзе на карысьць дзяржаве. А вось Аляксандар Фядута ў гэтым ня ўпэўнены. Ён кажа, што беларускі ўрад ужо ў панядзелак абвесьціць пра выхад з праграмы "Партнэрства дзеля міру" і распачнецца новая хваля рэпрэсіяў супраць незалежных палітыкаў і журналістаў. Спадар Фядута ўпэўнены, што А. Лукашэнка ў адказ сапраўды адмовіцца кантраляваць паток нелегальных мігрантаў і наркотыкаў, якія рухаюцца празь Беларусь на Захад.

(Фядута: ) "Гэта ў яго адзіная форма пратэсту, якая засталася. Усе астатнія формы пратэсту, у тым ліку публічныя выступленьні з трыбунаў, у яго забралі. І гэта вельмі дрэнна. Што б і як ні было б, трэба разумець, што любы лекар павінен выконваць прынцып "не нашкодзіць". Я думаю, гэта моцна нашкодзіць і грамадзянскай супольнасці Беларусі, і СМІ, і ўвогуле дэмакратычным працэсам. Гэта наўрад ці паскорыць развязку".

Алена Скрыган з ПКБ лічыць вінаватым у новым канфлікце з Захадам толькі А. Лукашэнку, але пацерпіць ад гэтага перш за ўсё ня ён, а беларускі народ, мяркуе яна - ад пагаршэньня эканамічных адносінаў з Захадам:

(Скрыган: ) "Усё гэта рэзка пагоршыла міжнароднае становішча нашай кріаны, і Беларусь апынулася ў такой самаізаляцыі, аб якой яшчэ нават паўгода таму гаварыць было нельга. Але беларускі народ адрэагуе на гэта так, як яму будзе сказана па БТ. Гэта наша бяда".

XS
SM
MD
LG