Паводле кіраўніка чэскага МЗС Цырыла Свобады, канчаткова пытаньне пра выдачу А.Лукашэнку візы мусіць быць вырашанае заўтра. На мінулым тыдні яго разглядаў чэскі ўрад. Афіцыйны Менск адрэагаваў на прамаруджваньне з выдачай візаў з раздражненьнем. Прэсавы сакратар А.Лукашэнкі Натальля Пяткевіч выступіла па БТ з адмысловай заявай:
(Пяткевіч: ) “Ужо сама пастаноўка пытаньня пра выдачу ці нявыдачу візаў беларускай дэлегацыі ёсьць зьневажальнай для беларускай дзяржавы, гэта прыніжае беларускі народ. Такая пастаноўка пытаньня парушае ўсе магчымыя міжнародныя нормы і правілы, паколькі адмысловага запрашэньня на гэты саміт не патрэбна”.
Натальля Пяткевіч перавяла пытаньне пра візу для А.Лукашэнкі ў праблему візаў для ўсёй беларускай дэлегацыі і стаўленьня Захаду да беларускай дзяржавы і народу.
Разам з гэтым прадстаўнік беларускага МЗС Аляксандар Байчораў выступіў з пагрозай пра магчымы дэмарш:
(Байчораў: ) “Калі ў парушэньне нормаў міжнароднага права чэскі бок гэтых візаў ня выдасьць, то, безумоўна, будзе самая жортская рэакцыя, і думаю, што наступствы будуць самыя сур’ёзныя”.
Як паведамілі ў прэсавай службе беларускага зьнешнепалітычнага ведамства, сёньня ў МЗС Беларусі быў запрошаны часовы павераны ў справах Чэхіі ў Беларусі Алеш Фойцік, якому міністар М.Хвастоў уручыў памятную запіску пра тое, што Беларусь будзе разглядаць адмову выдаць візы беларускай дэлегацыі як крок, скіраваны на падрыў двухбаковых адносінаў. Гаворыць Алеш Фойцік:
(Фойцік: ) “Тут трэба яшчэ разумець, што віза яшчэ не азначае, што ўсё вырашана з абодвух бакоў, віза — гэта толькі адна неабходная умова, каб візыт адбыўся. Ужо былі выпадкі, калі віза была — і чалавек альбо не паехаў, альбо ня змог патрапіць куды хацеў. Тут усё па-рознаму трэба разглядаць, а ўльтыматум гэта ці не — пытаньне ў тым, як беларускі бок гэта разумее”.
Спадар Фойцік упэўнены, што гэта пытаньне не амбасады, а МЗС Чэхіі, ураду, штаб-кватэры NATO, якія разам павінныя гэта вырашаць, гэта нельга разглядаць як пытаньне двухбаковых адносінаў.
Тым часам ня толькі ў А.Лукашэнкі і яго атачэньня ўзьніклі праблемы з чэскімі візамі. Справа ў тым, што ў амбасадзе Чэхіі ў Менску сапсаваліся кампутары. Як падкрэсьліў Алеш Фойцік, усё будзе адрамантавана на гэтым ці наступным тыдні. Але ні ў якім выпадку ня будзе парушаны законны тэрмін разгляду заявак на атрыманьне візы — адзін месяц.
Вядомы беларускі дыплямат і апазыцыйны дзеяч Андрэй Саньнікаў назваў нэрвовую рэакцыю Менску неадэкватнай:
(Саньнікаў: ) “Беларускі бок адрозьніваецца ад іншых краінаў хамскімі паводзінамі, у дачыненьні да Захаду, да АБСЭ”.
На думку А.Саньнікава, магчымы ня толькі пратэст на адрас чэскай амбасады, але і забарона беларускай дэлегацыі ў цэлым ехаць на саміт у Прагу, аднак любыя дзеяньні ў адказ ня могуць быць эфэктыўнымі.
Андрэй Саньнікаў лічыць, што жаданьне А.Лукашэнкі патрапіць на саміт у Прагу абумоўленае найперш жаданьнем давесьці свайму электарату, што ён прызнаны ў Эўропе лідэр:
(Саньнікаў: ) “Ён спадзяецца, што будзе мець магчымасьць сустрэцца з кіраўнікамі краінаў Захаду, але разьлічвае на свой электарат. Прыгадаем, што калі ён быў, напрыклад, на саміце ў Стамбуле, там ніхто зь ім не размаўляў, але ж усё роўна былі здымкі па БТ, і ён сам казаў, што ён сустракаўся і размаўляў з Клінтанам. Калі ёсьць такі відэафакт, то электарат можа і паверыць”.
