Кіраўнік упраўленьня Міністэрства прамысловасьці Васіль Васілевіч, які займаецца пытаньнямі энэргазахаваньня, кажа, што ніякіх прынцыпова новых крокаў на прадпрыемствах у гэтай сфэры ня робіцца. Ён тлумачыць, што рэжым эканоміі існаваў і раней, і ўсе прадпрыемствы даўно маюць адмысловыя праграмы энэргазахаваньня. Цяпер ім проста давядзецца рабіць заплянаваныя захады хутчэй.
А вось жыльлёва-камунальныя службы ўжо атрымалі новую інструкцыю зьменшыць спажываньне энэргіі на 20% у параўнаньні зь мінулым годам, кажа прадстаўнік Міністэрства жыльлёва-камунальнай гаспадаркі Ўладзімер Зелянкоў.
(Зелянкоў: ) “Зараз уводзяцца абмежаваньні па тэмпэратуры сецевай вады. Вы самі ў сваёй рэдакцыі маглі адчуць, што крыху халадней стала. Міністар сёньня на плянэрцы паўтарыў гэта кіраўнікам менскіх арганізацыяў, якім мы гэта накіравалі яшчэ 6 лістапада. Гэта ўсё кантралюецца дзяржаўнымі органамі энэргаэфэктыўнасьці”.
Аднак намесьнік кіраўніка Дзяржкамітэту ў справе энэргазахаваньня Аляксандар Сазановіч лічыць заплянаванае скарачэньне невыканальным.
(Сазановіч: ) “Я думаю, што 20% немагчыма зрабіць. Дай Бог, каб было 10–15 хаця б. Ёсьць такія прапановы, шмат чаго можна прапанаваць. Але ж трэба быць рэалістамі, як гэта рэалізаваць...”
Спадар Сазановіч кажа, што прадстаўнікі Дзяржкамітэту ў справе энэргазахаваньня ўжо чатыры дні правяраюць установы, прадпрыемствы і жылыя дамы.
(Сазановіч: ) “Мы цяпер глядзім, якая тэмпэратура ў пакоях, у памяшканьнях, што на калектары з ТЭЦ, з кацельных, ці выключаецца сьвятло, ці шчыльна зробленыя пад’езды, каб дзьверы не былі адчыненыя, шыбы не пабітыя. Правяраем прадпрыемствы — ці зьнізілі яны спажываньне, у такім вось кірунку працуем”.
Спадар Сазановіч таксама заклікаў грамадзянаў самім уцяпляць свае кватэры, зачыняць у пад’ездах дзьверы і эканоміць электрычнасьць.
