Суд Маскоўскага раёну Менску яшчэ 2 жніўня абавязаў газэту “Наша свабода” выплаціць 100 мільёнаў рублёў кампэнсацыі кіраўніку Камітэту дзяржкантролю Анатолю Тозіку. Тозік палічыў абразьлівай для ягонага гонару й годнасьці інфармацыю ў адным з артыкулаў газэты аб тым, што ён нібыта скардзіўся Аляксандру Лукашэнку на дзеяньні генэральнага пракурора Беларусі Віктара Шэймана. Пасьля прысуду газэта была вымушаная спыніць існаваньне. У верасьні калегія Менскага гарадзкога суду пакінула рашэньне ў справе “Нашай свабоды” бязь зьменаў.
Рэдактар і выдавец “Нашай свабоды” Павал Жук кажа, што спадзяваўся сваёй апэляцыяй хаця б пазьбегнуць канфіскацыі абсталяваньня, бо рэдакцыя брала яго ў арэнду. Аднак суд не палічыўся з гэтым фактарам.
(Жук: ) “Суд і судовыя выканаўцы проста не зьвяртаюць на гэта ўвагі, і атрымоўваецца наступнае — напрыклад, спадару Тозіку нехта вінаваты, а ён забірае гэтую пазыку ў суседа, які да гэтага ня мае ніякага дачыненьня”.
Самі судовыя выканаўцы адмовіліся пракамэнтаваць сытуацыю:
(Судовы выканаўца: ) “Прабачце, пакіньце памяшканьне, тут выконваецца рашэньне суду”.
Для Паўла Жука цяперашняя сытуацыя з “Нашай свабодай” ужо звычная, да прыкладу, ён выдаваў газэты “Свабода” і “Навіны”, якія былі вымушаныя закрыцца ў падобных абставінах.
(Жук: ) “Мы будзем спрабаваць выпускаць новую газэту, зараз мы да гэтага рыхтуемся. Нас такімі рэчамі як гэтае рабаўніцтва сярод белага дня проста запалохаць няможна. Бо з намі гэта робіцца ўжо ў пяты раз, мусіць”, — сказаў журналіст і выдавец Павал Жук.
