Лінкі ўнівэрсальнага доступу

logo-print

ГАРАДЗКІ СУД МЕНСКУ ПАКІНУЎ БЯЗЬ ЗЬМЕНАЎ ПРЫСУД МІХАІЛУ ЧЫГІРУ


Алег Грузьдзіловіч, Менск

Калегія Менскага гарадзкога суду разгледзела скаргу Міхаіла Чыгіра на прысуд, які тры месяцы таму быў вынесены яму Фрунзенскім раённым судом Менску. Тады Міхаіл Чыгір быў прызнаны вінаватым у службовай нядбайнасьці ды нявыплаце падаткаў і асуджаны на тры гады зьняволеньня з адтэрміноўкай на два гады.

З прысудам ён не пагадзіўся і паспрабаваў аспрэчыць яго ў гарадзкім судзе, але беспасьпяхова. Гарадзкія судзьдзі пакінулі прысуд бязь зьменаў. Цікава, што Міхаіл Чыгір нават не пайшоў у суд на перагляд сваёй справы, бо быў, як ён кажа, “на 100 адсоткаў перакананы ў адмоўным выніку”.

(Чыгір: ) “Я не хадзіў, бо ведаю, што на гарадзкім узроўні колькі ні разглядалі скаргі, ніколі іншых рашэньняў не прымалі. Яны ўсё дублююць. Спадзяваца магчыма толькі на Вярхоўны суд, ён яшчэ можа прыняць сваё рашэньне, а гарадзкі суд нічога не мяняе”.

Цяпер Міхаіл Чыгір будзе скардзіцца ў Вярхоўны суд, бо настойвае на сваёй невінаватасьці. Нагадаем, два гады таму Міхаіл Чыгір ужо быў асуджаны паводле артыкулу аб службовых злоўжываньнях, і менавіта Вярхоўны суд адмяніў тое рашэньне ды накіраваў справу на перагляд.

Пакуль вялося новае расьсьледаваньне справы Чыгіра, да ўмоўнага пакараньня была асуджаная ягоная жонка Юлія, і сем гадоў турмы атрымаў ягоны сын Аляксандар. Праваабаронцы Беларусі лічаць, што беларускія ўлады перасьледуюць сям’ю Чыгіроў з прычыны палітычнай дзейнасьці былога прэм’ера.
XS
SM
MD
LG