Лінкі ўнівэрсальнага доступу

АД 1 КАСТРЫЧНІКА ЗНОЎ ПАДВЫСІЛІСЯ ЦЭНЫ НА ТАВАРЫ Й ПАСЛУГІ


Ганна Соўсь, Менск

Сёньня ў чэргах у менскім мэтро людзі абураліся чарговым падвышэньнем цаны на праезд:

(Спадарыня: ) “Хай гэтак сама падвышаюць нам пэнсіі”.

(Другая спадарыня: ) “Тым больш, што ўмовы застаюцца ранейшымі, і транспарт дрэнна ходзіць”.

(Спадар: ) “Цэны растуць ня толькі на транспарт, на ўсё астатняе. Падвышэньне заробку не кампэнсуе выдаткі на траспарт ды іншае. З кожным падвышэньнем заробку мы жывем усё горш і горш”.

Зь сёньняшняга дня квіток на праезд у грамадзкім транспарце каштуе 180 рублёў замест 150. Сёлета гэта ўжо трэцяе падвышэньне. Апошні раз цану на праезд паднімалі ўсяго два месяцы таму, у жніўні. Усяго ж плата за праезд павялічылася сёлета больш чым удвая.

Ад 1 кастрычніка зноў вырасьлі й тарыфы на жыльлёва-камунальныя паслугі. Гэтым разам нязначна — на 3,3%. Але ж з пачатку году плата за кватэру павялічылася больш чым у пяць разоў. Для параўнаньня — за ўвесь 2001 год яна вырасла толькі на 38%.

У кастрычніку з чарговымі праблемамі сутыкнулася й недзяржаўная прэса. З чацьвертага кварталу аб’яднаньне “Белпошта” павялічыла тарыфы на распаўсюд газэтаў на 38%. Як паведамілі Радыё Свабода ў Міністэрстве інфармацыі, новыя тарыфы ня будуць тычыцца дзяржаўных выданьняў. Гаворыць прадстаўніца Міністэрства інфармацыі Галіна Гусакова:

(Гусакова: ) “Была нарада, і вызначылі, што на чацьверты квартал тарыфы для гэтых выданьняў ня будуць падвышаныя. Зараз вырашаецца пытаньне зь вяртаньнем залішне ўзятых грошай. У сувязі з тым, што ў іх заснавальнікі — дзяржаўныя структуры, яны й датуюцца зь дзяржбюджэту. Зараз ідзе рост усіх коштаў. Зразумела, у “Белпошты” растуць выдаткі, таму яна павялічвае тарыфы. Зразумела, што мы, як дзяржаўная структура, можам займацца толькі дзяржаўнымі выданьнямі. Мы можам падтрымаць толькі тыя выданьні, якія датуюцца зь дзяржбюджэту”.

А кіраўнік Цэнтру прававой абароны СМІ Беларускай асацыяцыі журналістаў Міхаіл Пастухоў мяркуе, што дадзеная сытуацыя сьведчыць пра грубае парушэньне дзейнага заканадаўства.

(Пастухоў: ) “Канстытуцыя забясьпечвае роўныя магчымасьці для прадпрыемстваў розных формаў уласнасьці. Калі будзе нанесены такі моцны ўдар, то недзяржаўная прэса ўвогуле можа стаць непрыбытковай. А гэта — адна з падставаў, каб пры канцы году выставіць абвінавачаньне газэтам, як бізнэс-структурам, у тым, што яны парушаюць гаспадарчае заканадаўства на падставе сумнавядомага дэкрэту прэзыдэнта №22. Там зазначана, што адной з падставаў для ліквідацыі суб’екту гаспадараньня ёсьць тое, што той працуе без прыбытку. Дык вось, тады ўсім недзяржаўным сродкам масавай інфармацыі можна будзе пры канцы году выставіць такое абвінавачаньне”.
XS
SM
MD
LG