Лінкі ўнівэрсальнага доступу

logo-print

ПРАДСТАЎНІКІ БЕЛАРУСІ РЫХТУЮЦЦА ДА ВЫСТУПУ НА СЭСІІ ПАРЛЯМЭНЦКАЙ АСАМБЛЕІ РАДЫ ЭЎРОПЫ


Ірына Халіп, Страсбур

Парлямэнтары вырашылі, што першым крокам павінна быць запрашэньне на наступнае паседжаньне камісіі, якое адбудзецца ўжо пасьля заканчэньня сэсіі, экспэртаў зь Беларусі і жонак зьніклых людзей.

Заўтра на пленарным паседжаньні сэсіі будзе разглядацца беларускае пытаньне. Парадак дня выглядае так: спачатку выступ адмысловага дакладчыка па Беларусі Вольфганга Бэрэндта, потым выступ дакладчыка ад Юрыдычнага камітэту Вацлава Станкевіча, а потым слова будзе дадзенае беларускай апазыцыі. Кансультацыйная рада апазыцыйных палітычных партыяў упаўнаважыла выступіць лідэра БНФ Вінцука Вячорку, які ўчора прыехаў у Страсбур.

(Карэспандэнтка: ) “Вінцук, заўтра ў вас будзе толькі пяць хвілінаў. Што вы пасьпееце сказаць і што найбольш галоўнае павінна прагучаць з гэтай трыбуны?”

(Вячорка: ) “Перадусім, у гэты сьціплы час я пералічу хаця б па адным-два прыклады невыкананьня беларускімі ўладамі асноўных умоваў дэмакратызацыі ў краіне, пры выкананьні якіх толькі і мажлівае прызнаньне Беларусі паўнавартасным сябрам супольнасьці дэмакратычных эўрапейскіх нацыяў. Ад імя апазыцыйных партыяў я падтрымаю прапанову Вольфганга Бэрэндта, якая ўжо абнародаваная празь Інтэрнэт, не надаваць Беларусі статусу адмыслова запрошанага. Разам з тым, тое, што пытаньне вяртаньня гэтага статусу стаіць на парадку дня, для нас ёсьць знакам, што Эўропа бачыць Беларусь незалежнай краінай і ў пэрспэктыве абавязкова дэмакратычнай. І яшчэ – апошняе, але ня менш важнае – у нас, украіне, у якой няма дэмакратыі, няма мэханізмаў выяўленьня рэальных настрояў грамадзтва. У гэтай сытуацыі, ды й наагул, нікому не дадзена права падымаць пытаньне пра магчымыя зьмены статусу незалежнай дзяржаўнасьці Беларусі”.

Дэпутаты палаты прадстаўнікоў Зінаіда Пянькова і Андрэй Лосеў таксама рыхтуюцца да паседжаньня па беларускім пытаньні. У прыватнасьці, яны сёньня доўга размаўлялі зь лідэрам расейскіх камуністаў Генадзем Зюганавым, які, дарэчы, на прэс-канфэрэнцыі паведаміў, што парлямэнцкая група Аб’яднаных левых, у склад якой ён уваходзіць, будзе выпрацоўваць сваю пазыцыю што да сытуацыі ў Беларусі і возьме актыўны ўдзел у дыскусіі.

Сёньня ж у Страсбур прыехаў з Парыжу Надзвычайны і Паўнамоцны Пасол Беларусі ў Францыі Ўладзімер Сянько.
XS
SM
MD
LG