Лінкі ўнівэрсальнага доступу

З 1 КАСТРЫЧНІКА ПРЫВАТНЫЯ ПРАДПРЫМАЛЬНІКІ БЕЛАРУСІ РАСПАЧНУЦЬ БЕСТЭРМІНОВЫ СТРАЙК


Міхал Стэльмак, Менск

Удзел у паседжаньні Аб'яднанай рады бралі лідэры прадпрымальнікаў Менску, Магілёву, Баранавіч, Жлобіна, Салігорску, Пінску, Наваполацку, іншых рэгіёнаў краіны. Прадстаўнік менскіх прадпрымальнікаў Анатоль Шумчанка зьвярнуўся да ўдзельнікаў зь ініцыятывай:

(Шумчанка: ) "Я прапаную прыняць на сёньняшнім сходзе Аб'яднанай рады прадпрымальнікаў рашэньне пра пачатак страйку з 1 кастрычніка з нявыплатай падаткаў. Да гэтага нас вымушаюць вынікі перамоваў з урадам. "Круглы стол" засьведчыў, што з намі прыйшлі весьці перамовы ня віцэ-прэм'еры і міністры, а "клеркі", якія ня маюць ніякіх паўнамоцтваў. Перамоўны працэс зайшоў у тупік. Вынік: гара нарадзіла мыш. Мы далей ня можам адступаць ад сваіх патрабаванняў".

Гэтая ініцыятыва была аднагалосна ўхваленая прадпрымальніцкімі лідэрамі. У прыватнасьці, вось што заявіў на паседжаньні лідэр наваполацкіх прадпрымальнікаў Валеры Шаўчэнка:

(Шаўчэнка: ) "Давайце мы зробім заяву пра пачатак страйку з 1 кастрычніка. Таму што сацыяльнае пытаньне не вырашаецца, пытаньне касавых апаратаў не вырашаецца. Даручэньне Кабякова – гэта касмэтычная рэч, якая ня вырашыць нашых праблемаў. Няма ў нас такіх рынкаў, якія нельга разагнаць. Іх усё роўна разгоняць".

Паводле Валерыя Шумчанкі, страйк з 1 кастрычніка падтрымаюць ня толькі ў Наваполацку, але й у іншых гарадох Віцебшчыны.

Пра неабходнасьць страйку заявіў на паседжаньні Аб'яднанай рады і лідэр пінскіх прадпрымальнікаў Сяргей Касьцюковіч:

(Касцюковіч: ) "Усе тры пінскія рынкі падтрымаюць акцыю пратэсту. Але рэч ня толькі ў касавых апаратах і сацыяльным страхаваньні. Усе нашыя беды ад двух дэкрэтаў прэзыдэнта – дванаццатага і васемнаццатага. Нам трэба працягваць акцыю пратэсту да выхаду дэкрэту прэзыдэнта, які прыпыніць дзеяньне двух дэкрэтаў".

Паводле сёньняшняга рашэньня Аб'яднанай рады, прадпрымальнікі зьбіраюцца дамагацца ад уладаў выкананьня эканамічных патрабаваньняў.
XS
SM
MD
LG