Лінкі ўнівэрсальнага доступу

logo-print

ІРАК ПАГАДЗІЎСЯ ДАПУСЬЦІЦЬ НА СВАЮ ТЭРЫТОРЫЮ ІНСПЭКТАРАЎ ААН


Алесь Грыневіч, Прага

Міністар замежных справаў Іраку Наджы Сабры ўчора позна ўвечары перадаў ліст свайго ўраду генэральнаму сакратару ААН Кофі Анану. Вось што сказаў кіраўнік Арганізацыі аб’яднаных нацыяў:

(Анан: ) “Я пацьвярджаю вам, што я атрымаў ліст ад ірацкіх уладаў, у якім гаворыцца аб іхным рашэньні дазволіць вяртаньне інспэктараў для працягу працы без папярэдніх умоваў. Ірак таксама пагадзіўся пачаць неадкладныя дыскусіі аб канкрэтных умовах вяртаньня інспэктараў і аднаўленьня іхнае працы”.

Замежныя інспэктары не наведвалі Ірак з 1998 году. Швэдзкі дыплямат Ганс Блікс, які апошнія два з паловай гады ачольвае інспэкцыю ААН, заявіў на гэтыя выходныя нямецкай газэце “Frankfurter Allgemeine Zeitung”, што першая група інспэктараў гатовая прыбыць у Ірак праз два тыдні.

Як паведамляе наш карэспандэнт у ААН Робэрт Макмэан, рашэньне Іраку дапусьціць інспэктараў было ў значнай ступені выклікана ціскам з боку міжнароднай супольнасьці. Гэты ціск узмацніўся пасьля выступленьня ў ААН у мінулы чацьвер прэзыдэнта ЗША Джорджа Буша, які заявіў, што Ірак адбудоўвае біялягічную, хімічную і ядзерную зброю. Гаворыць генэральны сакратар ААН Кофі Анан:

(Анан: ) “Я думаю, што прамова прэзыдэнта разварушыла міжнародную супольнасьць, і, як большасьць з вас чулі, амаль кожны выступоўца на Генэральнай Асамблеі заклікаў Ірак дапусьціць вяртаньне інспэктараў”.

Прадстаўнікі Іраку тлумачаць сваё рашэньне выключна парадамі з боку арабскіх ды іншых сяброўскіх краінаў. Вось што сказаў намесьнік прэм’ер-міністра Іраку Тарык Азыз:

(Азыз: ) “Гэта патрабаваньне, якое мы чулі ад нашых арабскіх братоў, сяброўскіх афіцыйных асобаў у краінах, якія выказаліся па гэтым пытаньні, а таксама ад краінаў руху недалучэньня ды іншых блёкаў сяброўскіх краінаў”.

Ірацкі віцэ-прэм’ер заявіў, што цяпер ЗША ня маюць ніякіх падставаў ужываць сілу супраць Іраку.

Аднак некаторыя заходнія экспэрты папярэджваюць, што Ірак можа ў апошні момант увесьці абмежаваньні на дзейнасьць інспэктараў, зрабіўшы іхную працу бессэнсоўнай. Уплывовы амэрыканскі штодзёньнік “The New York Times” у сёньняшнім нумары друкуе меркаваньне, што прапанова Іраку можа быць спробай пацягнуць час і раскалоць Раду Бясьпекі ААН.
XS
SM
MD
LG