Лінкі ўнівэрсальнага доступу

АНАТОЛЬ ЛЯБЕДЗЬКА НАЗЫВАЕ ЗАПІС ЯГО ТЭЛЕФОННАЙ РАЗМОВЫ З БАРЫСАМ НЯМЦОВЫМ “РАБОТАЙ БЕЛАРУСКІХ СПЭЦСЛУЖБАЎ”


Уладзімер Глод, Менск

Вядучы “Постскрыптума” Юры Пракопаў спасылаўся на расейскую газэту “Советская Россия”, у якой 3 верасьня быў надрукаваны матэрыял пад назовам “Турбуе прыёмная Нямцова...” У рэдакцыйнай прадмове адносна тэлефоннай размовы Барыса Нямцова і Анатоля Лябедзькі пішацца наступнае: “З запісу выцякае, што Крэмль уступіў у сакрэтныя перамовы зь беларускай апазыцыяй і робіць стаўку на зрынаньне Лукашэнкі”.

Паводле газэты, існуе адмысловы плян дзеяньняў: “Што алігархі, якія жадаюць пазбавіцца ад Лукашэнкі, заклікаюць Крэмль дэстабілізаваць становішча ў рэспубліцы і выклікаць бунт. Што нянавісьць да беларускага лідэра мае ня толькі палітычны і эканамічны характар, але амаль рэлігійны – як да славянскага лідэра, народнага правадыра, любімца беларусаў і расейцаў. Што апошнія радыкальныя заявы Пуціна ёсьць бесцырымонным шантажом Лукашэнкі...”

Газэта таксама сьцьвярджае, што інфармацыя тычыцца “найвастрэйшай правакацыі вакол беларуска–расейскай дамовы”. А гэтак званая размова Нямцова і Лябедзькі – толькі дадатак, дзе называюцца некаторыя дэталі пляну. Напрыклад, такія як дамоўленасьць Нямцова з намесьнікам кіраўніка Адміністрацыі прэзыдэнта Расеі Сурковым, пра тое, што ў Крамлі прымуць дэлегацыю Аб’яднанай грамадзянскай партыі.

Я спытаўся ў Анатоля Лябедзькі, ці была ў яго такая размова з Барысам Нямцовым. Лідэр АГП адказаў на пытаньне гэтак:

(Лябедзька: ) “Я амаль кожны дзень размаўляю па тэлефоне з замежнымі палітыкамі, у тым ліку й расейскімі. А з Барысам Нямцовым мы размаўляем амаль штотыдзень”.

(Карэспандэнт: ) “А чым Вы тлумачыце зьяўленьне гэткай публікацыі?”

(Лябедзька: ) “Зьяўленьне артыкулу ў расейскай прэсе ёсьць сьведчаньнем працы беларускіх спэцслужбаў, якія пачалі ствараць скандал вакол дачыненьняў Пуціна і Лукашэнкі. Я глыбока перакананы, што “зьліў інфармацыі” ў Расею быў арганізаваны беларускімі спэцслужбамі — у мяне ёсьць асабістыя падставы. Я хачу нагадаць, што каля маёй кватэры нядаўна знайшлі прыставаньне для падслухоўваньня размоваў. Гэта ёсьць нервовай рэакцыяй на стасункі АГП у Маскве на даволі высокім узроўні. Лукашэнка ня можа перажыць, што ня ён вырашае, хто прымае нас у Адміністрацыі прэзыдэнта Расеі або Дзярждуме”.

У прыёмнай Барыса Нямцова мне сёньня паведамілі, што кіраўнік фракцыі СПС у Дзярждуме — да 7 верасьня ў адпачынку ў Сочы. Адпаведную заяву ён зробіць пазьней. Паводле агенцыі “Інтэрфакс”, у Сочы сп. Нямцоў пацьвердзіў, што некаторы час таму ён вёў такую размову са свайго службовага кабінэту ў Думе. Пры гэтым Нямцоў падкрэсьліў, што, нягледзячы на канфідэнцыйны характар гэтай размовы, ўсё, пра што ён казаў, было агучана раней публічна: і адносна палітыкі Лукашэнкі, і адносна пэрспэктываў саюзу Расеі й Беларусі.

Нямцоў заявіў, што мае намер зьвярнуцца да генэральнага пракурора Расеі наконт праслухоўваньня ягонага службовага тэлефону. Паводле новага расейскага Крымінальна-працэсуальнага кодэксу, які пачаў дзейнічаць у Расеі зь 1 ліпеня, праслухоўваньне тэлефонных размоваў магчымае толькі праз рашэньне суду, а ня з санкцыі паркурора, як было раней. У Беларусі для праслухоўваньня дастаткова санкцыі пракурора.


“Салідная газэта” – гэтак прадстаўляе сваё выданьне рэдактар “Советской Белоруссии” Павал Якубовіч. Аднак цяперашні перадрук перахопу чужых тэлефоных размоваў стаў ужо звыклым жанрам для “Советской Белорусии”. Напярэдадні леташніх выбараў газэта ўжо друкавала на цэлы разварот раздрукоўкі размоваў тагачаснага кіраўніка Кансультацыйна-назіральнай групы АБСЭ Віка з беларускімі палітыкамі і журналістамі. Тады, дарэчы, гэта таксама быў перадрук з тых жа “Советской России” і “Завтра”. Салідная газэта і зьліўны бачок – гэта ўсё ж крыху розныя прыстасаваньні.
XS
SM
MD
LG