Лінкі ўнівэрсальнага доступу

ПАСЬЛЯ ЎВЯДЗЕНЬНЯ НОВЫХ МЫТНЫХ ПРАВІЛАЎ ЧЭРГІ НА ПАМЕЖНЫХ ПЕРАХОДАХ СТАЛІ ДАЎЖЭЙШЫЯ


Алег Супрунюк, Берасьце

Чарга аўтамабiляў на памежным пераходзе "Варшаўскi мост" каля Берасьця сёньня расьцягнулася прыкладна на два кiлямэтры. З польскага боку ў чарзе стаяла яшчэ больш аўтамабiляў – пераважна зь беларускiмi нумарамi. Ужо пасьля перасячэньня мяжы яны распавядаюць, што памежны i мытны кантроль зараз iдзе вельмi марудна. Большасьць аўтамабiляў падлягае дадатковаму агляду беларускiх мытнiкаў. У першую чаргу яны зьвяртаюць увагу на набытую ў Польшчы сельгаспрадукцыю i патрабуюць, каб яе вага складала ня больш за 10 кiляграмаў на кожнага чалавека. У iншым выпадку мытнiкi абавязваюць кiроўцаў пакiдаць лiшкi харчоў на польскай тэрыторыi. Пакуль гэта ня будзе зроблена, машынам забаронены праезд праз мяжу.

Значна менш цяпер вывозяць праз памежны пераход будаўнiчыя матэрыялы i бытавую тэхнiку, якiя таксама карысталiся попытам у беларусаў, што наведваюць Польшчу. Мытнiкi адсочваюць, каб кошт увезенага на Беларусь тавару не перавышаў адну тысячу амэрыканскiх даляраў, а ягоная агульная вага складала ня больш за 50 кiляграмаў. Калi гэтыя нормы не вытрымлiваюцца, уладальнiк тавару абавязаны сплацiць мытную пошлiну памерам у 30%, альбо аформiць груз паводле правiлаў, усталяваных для юрыдычных асобаў. Для большасьцi перавозчыкаў гэта нявыгадна, таму Польшчу яны наведваюць радзей. Пра тое, як адбiлiся апошнiя зьмены ў мытным заканадаўстве на звычайных грамадзянах, распавядае адзiн зь берасьцейскiх кiроўцаў.

(Кiроўца: ) "Паўплывала, канечне. Хто гэтым займаўся, таму стала горш. Але ўсё роўна ў нас людзi разумныя i шукаюць выйсце. Таму што гэта – першакрынiца заробку. Няма нiдзе працы зараз, i таму нiчога iншага не застаецца рабiць".

Намесьнiк начальнiка берасьцейскай мытнi Канстанцiн Руцкi паведамiў, што з-за вялiкiх чэргаў на аўтамабiльных пераходах больш людзей пачалi вяртацца з Польшчы цягнiкамi. Але i тут мытнiкi змагаюцца з тымi, хто спрабуе ўвезьцi на Беларусь шмат тавараў. Гаворыць Канстанцiн Руцкi:

(Руцкi: ) "У нас у чым асаблiвасьць: у цягнiку пасажыр бярэ паклажу ў рукi. Ён i возьме 50 кiляграмаў. Адзiная праблема ў тым, што ёсьць перавозчыкi, якiя раздаюць тавар спадарожнiкам i кожны вязе, напрыклад, па 40 кiляграмаў. Агулам атрымлiваецца 120. Было два такiх выпадкi – мы iх спынiлi".
XS
SM
MD
LG