Лінкі ўнівэрсальнага доступу

МАСКОЎСКІ СУД МЕНСКУ НЕ ЗАДАВОЛІЎ ПАЗОЎ ЧАРГОВАЙ ГРУПЫ БАЦЬКОЎ, ЧЫЕ ДЗЕЦІ ЗАГІНУЛІ НА СТАНЦЫІ МЭТРО “НЯМІГА”


Галіна Абакунчык, Менск

Бацькі заяўляюць, што суд стаў на абарону інтарэсаў дзяржавы і намерваюцца зьвяртацца ў вышэйшыя судовыя інстанцыі, а таксама праваабарончыя арганізацыі.

Ганна Саладкевіч, Ганна Саўко і Сьвятлана Карпека лічаць, што ў трагедыі вінаватыя арганізатары сьвята. Жанчыны патрабавалі праз суд спагнаць зь іх па 100 мільёнаў беларускіх рублёў на карысьць кожнай сям’і за матэрыяльныя страты і маральныя пакуты.

Чыноўнікі ад арганізацыяў-адказчыкаў не прызналі сваёй віны нават часткова, а кампанія “Кляс-Клюб”, міліцэйскія чыноўнікі Кандрацін і Русак, якія непасрэдна адказвалі за правядзеньне сьвята, на паседжаньне ўвогуле не зьявіліся. Але судзьдзя Шастакоў адхіліў хадайніцтвы аб іхным прыводзе ў суд, а патрабаваньні заяўнікаў прызнаў бяздоказнымі й у выніку слуханьняў вынес рашэньне на карысьць дзяржаўных органаў.

Вось як гэта камэнтуе пацярпелая Сьвятлана Карпека:

(Карпека: ) “Суд абараняе правы дзяржавы, а не чалавека. Вось гэта й было даказана ў судзе, што жыцьцё грамадзяніна Беларусі нічога ня значыць для дзяржавы, абсалютна ня цэніцца”.

У тым, што суд у Беларусі адстойвае інтарэсы дзяржавы, а не яе грамадзянаў, перакананая таксама й удзельніца аналягічнага працэсу Натальля Навакоўская. Месяц таму гэты ж суд адмовіўся задаволіць аналягічны пазоў спадарыні Навакоўскай, а таксама Ніны Іньковай і Вольгі Янцовай. Але яны ўсё ж намерваюцца працягваць барацьбу і нават зьбіраюцца даслаць ліст Ўладзімеру Пуціну. Гаворыць Натальля Навакоўская:

(Навакоўская: ) “Мы бачым, як прэзыдэнт Пуцін ставіцца да сваіх трагедыяў: людзей падтрымліваюць. А ў нас загінула столькі людзей і чыста такое – каб толькі адчапіцца”.

Адвакат Алег Воўчак, які ў якасьці абаронцы ўдзельнічаў у абодвух працэсах, сьцьвярджае, што ў сёньняшнім становішчы несвабоды такі судовы вэрдыкт лёгка вытлумачальны. Аднак, прымаючы такія рашэньні, суд працуе не на карысьць свайго іміджу ды прэстыжу дзяржавы. Гаворыць Алег Воўчак:

(Воўчак: ) “Рашэньне вынесенае незаконна – гэтак жа, як і ў першым судовым працэсе. Тут і Канстытуцыя, і законы, і жыцьцё чалавека – і суд усё адхіляе. Праблема суду будзе ў тым, што ён губляе імідж сярод ня толькі звычайных грамадзянаў, але й сярод эліты грамадзтва, бо Няміга – гэта грамадзка-значная зьява. Проста суд ператварыўся ў выканаўчую ўладу”.

Сёньняшняе рашэньне Маскоўскага райсуду пацярпелыя намерваюцца абскардзіць у гарадзкім судзе Менску.
XS
SM
MD
LG