Лінкі ўнівэрсальнага доступу

ПРАТЭСТ СУПРАЦЬ АНТЫДЭМАКРАТЫЧНАЕ ПАЛІТЫКІ ГАРАДЗКІХ УЛАДАЎ ВЫКАЗАЛІ АРШАНСКІЯ ПРАДПРЫМАЛЬНІКІ ДЫ ПРАДСТАЎНІКІ НЕЗАЛЕЖНАЕ ПРЭСЫ.


Браніслава Станкевіч, Ворша

Пікет у Воршы каля кінатэатра “Перамога” распачаўся а 4-й вечара. Ад пачатку на ім сабраліся аршанскія прадпрымальнікі ды рынкавыя гандляры зь ліку тых, што ўдзельнічалі ў нядаўнім агульнабеларускім страйку ды засьведчылі сваё адмоўнае стаўленьне да сучаснае дзяржаўнае падатковае палітыкі. Але неўзабаве пад плякатам “Новыя сацыяльныя падаткі – гэта рэкет з боку дзяржавы” сабраліся ўжо некалькі дзесяткаў чалавек, і пікет па сутнасьці ператварыўся ў прафсаюзны сход на чале са старшынём прадпрымальніцкае суполкі Вольнага прафсаюзу Аляксандрам Сталяровым.

Да ўдзелу ў гэтым сходзе былі прыцягнутыя і гараджане- мінакі – асноўныя пакупнікі Аршанскага рынку. Ім раздавалі ўлёткі пад назовам “Посьпех нашага гандлю залежыць ад вашага дабрабыту”, дзе апавядаецца пра ўчорашняе павелічэньне адзінага мясцовага падатку з рынкавых гандляроў. Але пакуль на працягу цэлае гадзіны гандляры ды пакупнікі абмяркоўвалі непазьбежнае ў сувязі з гэтым падвышэньне коштаў на аршанскім рынку, гарадзкое кіраўніцтва, з дазволу якога і праводзіўся сёньняшні пікет, так і не палічыла патрэбным яго наведаць. Гэта з незадавальненьнем адзначылі амаль усе ўдзельнікі прадпрымальніцкае дыскусіі…

Працягнулі абмеркаваньне цяперашняе палітыкі гарадзкога кіраўніцтва супрацоўнікі незарэгістраванай аршанскай незалежнай газэты “Куцейна”. А 5-й вечара яны выйшлі працягваць пікетаваньне, маючы плякат са словамі “Аршанская карумпаваная ўлада баіцца, што людзі даведаюцца праўду, і не дазваляе выпускаць “Куцейну”. Нагадаем, што гэтай газэце “абвясьціў вайну” асабіста старшыня Аршанскага гарвыканкаму Валяньцін Майсяюк. Цяпер газэта ня мае магчымасьці быць зарэгістраванай, бо ўсе суб’екты гаспадараньня ў Воршы атрымалі з гарвыканкаму негалосны загад адмаўляць рэдактару “Куцейны” Віктару Андрэеву ў прадстаўленьні юрыдычнае адрэсы. У такую няміласьць “Куцейна” трапіла пасьля таго, як летась надрукавала артыкул пра кватэрныя махінацыі з удзелам старшыні гарвыканкаму. Дарэчы, некалькі сотняў паасобнікаў гэтага артыкулу былі раздадзеныя на сёньняшнім пікеце аршанскім мінакам…

Мінакі атрымалі і паасобнікі “Акту незалежнасьці Беларусі”, якія распаўсюджвалі аршанскія сябры Кансэрватыўна-Хрысьціянскай Партыі БНФ, таксама далучыўшыся да пікетоўцаў. Бо, паводле словаў старшыні гарадзкое суполкі КХП БНФ Юрася Конышкі, толькі сапраўдная незалежнасьць краіны можа быць гарантам сацыяльных ды эканамічных правоў яе грамадзянаў.
XS
SM
MD
LG