Лінкі ўнівэрсальнага доступу

ЗВОЛЬНЕНЫ ГАЛОЎНЫ РЭДАКТАР ПРАФСАЮЗНАЙ ГАЗЭТЫ “БЕЛАРУСКІ ЧАС” АЛЯКСАНДАР СТАРЫКЕВІЧ


Міхал Стэльмак, Менск

Вось што ён паведаміў сёньня нашаму радыё:

(Старыкевіч: ) “Мяне азнаёмілі з распараджэньнем старшыні Фэдэрацыі прафсаюзаў. Гэта адбылося ўчора ўвечары, дзень звальненьня — сёньня, 9 жніўня”.

(Карэспандэнт: )“Ці паспрабавалі вы высьветліць прычыны свайго звальненьня?”

(Старыкевіч: )“Ніякай гутаркі з Козікам у мяне не было. Дагэтуль ён не знайшоў часу сустрэцца з калектывам. Хай ужо рэдактар не падабаецца, але ж зь іншымі супрацоўнікамі, я лічу, можна было б пагаварыць і выкласьці сваю пазыцыю, свае падыходы да газэты. Я думаю, прычыны тут зразумелыя. Мой прафэсійны падыход не задавальняе новае кіраўніцтва Фэдэрацыі. Бо тут зараз трэба прапагандыст. Прапагандыст лініі, якую зараз праводзіць улада”.

Сёньня ж адбылася прэсавая канфэрэнцыя Леаніда Козіка, дзе ён наступным чынам пракамэнтаваў звальненьне Старыкевіча:

(Козік: ) “Я ўчора падпісаў загад пра звальненьне рэдактара газэты “Беларускі час” Старыкевіча. Ён не пярэчыў. І я скажу, чаму не пярэчыў, нават, па-мойму, згодны быў — таму што ён раней падпісаў заяву, што ў выпадку звальненьня яму мусяць выплаціць двухмесячную кампэнсацыю. Мы яе выплацім”.

Лідэр галіновага прафсаюзу аўтасельгасмашу Аляксандар Бухвостаў, камэнтуючы нашаму радыё звальненьне Старыкевіча старшынём Фэдэрацыі, назваў яго незаконным:

(Бухвостаў: ) “Калі Козік прапанаваў звольніць паводле гэтага артыкула Старыкевіча, прэзыдыюм Фэдэрацыі яму адмовіў. Ён ня меў права гэта рабіць бяз згоды і ўхваленьня прэзыдыюму. Ён парушыў гэтае права, статут Фэдэрацыі. Што гэта за старшыня Фэдэрацыі, які толькі заняў пасаду і тут жа пачаў з парушэньня статуту Фэдэрацыі? Я лічу гэта недапушчальным. Гэта азначае, што Козік дзейнічае па ўказаньні зьверху”.

Між іншым, гэтак лічыць і Аляксандар Старыкевіч:

(Старыкевіч: ) “Думаю гэтая сытуацыя прадэманстравала, што Козік лічыць сябе не кіраўніком незалежнага прафцэнтру, а ўпаўнаважаным Лукашэнкі па Фэдэрацыі прафсаюзаў”.

(Карэспандэнт: ) “Ці законнае такое рашэньне? Ці будзеце яго абскарджваць?”

(Старыкевіч: )“Я не юрыст. Таму зараз усе абставіны таго, што здарылася, вывучаюць спэцыялісты Беларускай асацыяцыі журналістаў, і рашэньне я буду прымаць па выніках іхнага аналізу. Але трэба мець на ўвазе, што ў сёньняшніх умовах, нават калі ўсе аргумэнты будуць на маю карысьць, давесьці гэта праз суд будзе надзвычай складана”.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG