Лінкі ўнівэрсальнага доступу

СА СПЭЦПРЫЁМНІКА-РАЗЬМЕРКАВАЛЬНІКА НА ВУЛІЦЫ АКРЭСЬЦІНА ВЫЙШАЎ НА ВОЛЮ ЛІДЭР МАЛАДОГА ФРОНТУ СЕВЯРЫНЕЦ


Любоў Лунёва, Менск

На пляцоўцы перад брамай спэцпрыёмніка сустракаць Паўла Севярынца сабраліся каля трох дзясяткаў сяброў Маладога Фронту. На Акрэсьціна прыехалі таксама Вінцук Вячорка і Вячаслаў Сіўчык. Прыблізна а першай гадзіне дня адчыніліся дзьверы.

(Севярынец: ) "Згарэў суд Цэнтральнага раёну?! Дарэчы, што зь Цімафеем? Ён у шпіталі? Ён цяпер не прыкаваны кайданкамі? У мяне баявы настрой. Хаця, канечне, сядзець было цяжкавата, бо душна. Людзей больш, чым трэба. У камэры, разьлічанай на шэсьць чалавек, сядзелі дзевяць.

Зрэшты, усё нармалёва. Больш размаўляў зь людзьмі. Пісаў кнігу пра нашае пакаленьне моладзі, якую я разьлічваю прэзэнтаваць 6 верасьня на пяцігадовы юбілей Маладога Фронту. Вельмі ўдзячны сябрам, якія падтрымлівалі і перадавалі перадачы. Абыходзіліся нармалёва. Там усе ведаюць і нават пабойваюцца. "Палітычных" там вельмі паважаюць. Кажуць: "Павал Канстанцінавіч, калі ж вы там ужо справіцеся?" Так акуратненька запытваліся. Ну, а я ім: "Усё залежыць ад нас з вамі. Рана ці позна, але абавязкова справімся. Давайце разам".

Лідэр Беларускага Народнага Фронту Вінцук Вячорка паведаміў Радыё Свабода:

(Вячорка: ) "Шчыра кажучы, я думаў, што рэшткі мазгоў ва ўлады ўсё ж ёсьць. Таму што й акцыя, за якую -пакаралі Паўла, была прысьвечаная свабодзе прэсы. Яна адбывалася ў дзень абвяшчэньня сувэрэнітэту Беларусі і была прысьвечаная свабодзе Беларусі і свабодзе прэсы. Уласна кажучы, ніякіх парушэньняў людзі, якія ладзілі акцыю, не рабілі. Увогуле, гэтая чарада пасадак і справаў...

Я скажу пра фронтаўцаў. Хадыка, Івашкевіч, а цяпер чарговы раз Севярынец — гэта чарговы раз паказвае, што ўсе наіўныя спадзяваньні, што пасьля 9 верасьня, пасьля трыўмфальнай перамогі Лукашэнка будзе рабіць нейкія жэсты ў кірунку дэмакратычных сілаў, незалежніцкіх сілаў — усё гэта пустыя ілюзіі. Ніякіх паслабленьняў ня будзе, ніякім незалежнікам Лукашэнка ня будзе, нават пры зьмяненьні пуцінскага стаўленьня да яго. Усё будзе працягвацца, а значыць працягваецца наша барацьба".

З чатырох палітвязьняў у вязьніцах засталіся двое — Валеры Шчукін у Бераставіцкім ізалятары часовага ўтрыманьня і Леанід Малахаў у менскім спэцпрыёмніке на вуліцы Акрэсьціна. Цімафей Дранчук знаходзіцца ў аддзяленьні кардыялёгіі трэцяга шпіталю.

У прадпрымальніка Леаніда Малахава сёньня дзень народзінаў. Ягоныя паплечнікі і сябры моладзевага руху "Зубр" зьбіраюцца а 18 гадзіне ля плоту спэцпрыёмніка, каб такім чынам павіншаваць і падтрымаць свайго сябра.

Заўтра ў яго скончыцца тэрмін пакараньня і ён выйдзе на волю.


XS
SM
MD
LG