Лінкі ўнівэрсальнага доступу

ВОЛЬФГАНГ БЭРЭНДТ ЛІЧЫЦЬ, ШТО ЭЎРОПА МУСІЦЬ УПЛЫВАЦЬ НА БЕЛАРУСЬ


Алена Панкратава, Прага

Камэнтуючы апошнія захады беларускага кіраўніцтва супраць газэты «Наша Свабода» і «Радыё Свабода», спадар Бэрэндт у інтэрвію нашаму радыё паведаміў наступнае:

(Бэрэндт: ) «У прынцыпе ўсё, што цяпер назіраецца, ёсьць працягам таго, што ўсе мы ведаем і што мы зусім нядаўна перажылі. Я маю на ўвазе перасьлед і прысуд журналістаў гарадзенскай «Пагоні», а таксама перасьлед рэдактараў газэтаў «Рабочы» і «Народная Воля». Мне падаецца, што Лукашэнка вырашыў надалей праводзіць рэпрэсіі супраць журналістаў, каб прымусіць замоўкнуць любыя крытычныя галасы.

У гэтым зьвязку як не ўзгадаць, што ў часе нядаўняга юбілею газэты «Советская Белоруссия» Лукашэнка сказаў, што журналісты павінны крытычна падаваць сытуацыю ў грамадзтве. Кіраўніку дзяржавы, зразумела, захацелася паказаць свой лібэралізм. На справе ж тых журналістаў, якія сапраўды дэманструюць сваё крытычнае стаўленьне да рэжыму, кіраўніцтва краіны імкнецца запалохаць».

(Радыё Свабода: ) Спадар Бэрэндт, днямі нямецкае выданьне «Frankfurter Rundschau» напісала, што Вы не зьбіраецеся пакінуць у спакоі тэму Беларусі... Што як эўрапейскі палітык Вы зьбіраецеся ў гэтым зьвязку рабіць?

(Бэрэндт: ) «Я думаю, што тэму Беларусі тут на Захадзе трэба шырока абмяркоўваць. Як у прэсе, так і на паседжаньнях эўрапейскіх структураў, той самай Рады Эўропы, арганізацыі, якая налічвае больш за 40 сяброў. Я лічу, што гэта вельмі добры форум для гэткага абмеркаваньня. Не так даўно разам з дэлегацыяй я быў у Беларусі і я напісаў на гэтую тэму справаздачу. Разам з калегамі з Страсбуру мы абавязкова абмяркуем гэтую тэму ў верасьні. Мы якраз будзем абмяркоўваць тыя мэханізмы, якія рэжым выкарыстоўвае ў справе запалохваньня сваёй апазыцыі».

(Радыё Свабода: ) Калі шчыра, наколькі вялікі інтарэс да Беларусі з боку эўрапейскіх палітыкаў, грамадзкасьці, цяпер, калі няма такіх буйных палітычных падзеяў, як тыя самыя выбары...

(Бэрэндт: ) «Я думаю, што інтарэс вырас. І выклікана гэта тым, што апошнім часам мы чуем не самыя радасныя весткі з Рэспублікі Беларусь. Мы чуем пра прысуды і працэсы супраць журналістаў і палітыкаў, пра канфлікт з АБСЭ, зьявы вельмі нэгатыўныя. Тое, што павінна будзіць інтарэс да Беларусі ў эўрапейскіх СМІ. Лічу, што гэты інтарэс трэба выкарыстоўваць».

(Радыё Свабода: ) Наколькі вядома, гэтымі днямі Вы далі шмат інтэрвію пра Беларусь у нямецкіх СМІ. Нават сёньня напярэдадні нашай з Вамі размовы Вы гутарылі з карэспандэнтам нямецкага радыё...

(Бэрэндт: ) «Так, гэта было WDR – заходненямецкае радыё, вельмі папулярная праграма «Эўропа», якая запрашае палітыкаў у жывы эфір. Размова ішла ня толькі пра перасьлед беларускіх СМІ, а ўвогуле пра агульную сытуацыю ў Беларусі, пра тое, якім чынам Эўропа можа зрабіць уплыў на гэтую краіну. Я лічу, што мы павінны сфармуляваць свае патрабаваньні да Менску, якія ён абавязкова павінен выканаць у тым выпадку, калі Беларусь сапраўды хоча наблізіцца да Рады Эўропы. Зь іншага боку, мы павінны спрабаваць разьвіваць усе магчымыя кантакты, каб умацаваць грамадзянскую супольнасьць унутры Беларусі».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG