Лінкі ўнівэрсальнага доступу

БЕЛАРУСКІ ДЫЯЛЁГ НА ІНТЭРНЭЦЕ. ЦІ ІСНУЕ ЦЭНЗУРА Ў МЕНСКІХ ІНТЭРНЭТ-КАВЯРНЯХ, ЯК ЗНАЙСЬЦІ БЕЛАРУСАЎ У ЗАМЕЖЖЫ ПРАЗЬ СЕЦІВА…


Сяржук Сокалаў-Воюш, Прага

Між тым, у Беларусі ўжо існуе практыка, калі забароненыя друкаваныя сродкі масавай інфармацыі працягваюць сваё існаваньне ў Інтэрнэце. Так здарылася з газэтай “Пагоня”, так было з папярэдніцамі “Нашай Свабоды” – газэтамі “Свабода” й “Навіны”.

Ці прадугледжвае “Наша Свабода”, у выпадку здушэньня, перайсьці ў сусьветнае сеціва? Гаворыць выдавец і рэдактар газэты Павал Жук:"

(Жук: ) “Мы разглядаем гэтую магчымасьць. У нас зараз ёсьць праблемы з Інтэрнэтам, але яны павіны вось-вось вырашыцца. У Інтэрнэце мы выходзіць будзем, але асноўнае мы ўсё ж думаем, што мы будзем рабіць газэтны варыянт. Здавацца мы не зьбіраемся. Я пацьвярджаю – газэту мы выдаваць будзем у любым выпадку. Не – ну, значыць, будзем рэгістраваць наступную”.

(Сокалаў-Воюш: ) “Беларусы Сьвету. Знайдзі сваіх”. Менавіта пад такой назвай зьявілася на Беларускай палічцы (http://my.knihi.com/) Інтэрнэту новая старонка, якая ўжо сёньня пачынае набываць папулярнасьць. Стваральнік навінкі – Андрусь Жвір паставіў перад сабой высакародныя мэты:

“Здараецца так, – чытаем ва ўступным слове аўтара, – што на чужыне беларусы жывуць у адным горадзе, на адной вуліцы, але нічога пра гэта ня ведаюць. Спадзяемся, што гэтая старонка дапаможа Вам знайсьці нашых суайчыньнікаў па-за межамі сёньняшняй Рэспублікі Беларусь”.

Адметная рыса старонкі – гэта незагружанасьць нейкімі аздобамі ці процьмай банэраў. Адзінае ўпрыгожаньне зь дзясятак беларускіх сьцягоў, якія часткова перакрываюць адно аднаго і ствараюць уражаньне адзінага хвалістага сьцягу. Нібыта душы раськіданых па сьвеце беларусаў злучаюцца ў адно цэлае.

Я марна спрабаваў зьвязацца са стваральнікам старонкі “Беларусы сьвету” Андрусём Жвіром. Ён жыве ў Аўстрыі, але цяпер выехаў на вакцыі ў Менск. І ўсё ж – о, чароўная сіла Інтэрнэту! – пад час збору водгукаў пра старонку я затэлефанаваў у Францыю да Вольгі Колас, чые каардынаты пазначаныя ў гэтым Інтэрнэт-выданьні:

(Вольга Колас: ) “Справа ў тым, што мой брат – адзін са стваральнікаў гэтага сайту http://www.knihi.com/. Ён робіць Гэтую старонку з Андрусём Жвіром і я ведаю яе з нараджэньня старонкі. Я вырашыла зьмясьціць свае зьвесткі там і магчыма адшукаць некага, хто знаходзіцца зараз у Францыі як і я”.

(Сокалаў-Воюш: ) “Старонка Вам падабаецца?”

(Вольга Колас: ) “Старонка мне падабаецца і я думаю, што гэта цікавая задумка”.

(Сокалаў-Воюш: ) “Што ж, гэткім чынам, пытаньні падрыхтаваныя да Андруся Жвіра мы падаем да яшчэ аднаго аўтара Паўла Коласа.

Павал, як стаць удзельнікам вашай старонкі?”

(Павал Колас: ) “Проста трэба выходзіць на гэтую старонку і зарэгістравацца”.

(Сокалаў-Воюш: ) “Павал, сёньня ўдзельнікаў старонкі яшчэ ня шмат і на тое, каб перагледзіць прозьвішчы адрасатаў патрэбна ня больш гадзіны. Ці няма ідэі арганізаваць выданьне такім чынам, каб прозьвічы ў ім выстаўляліся паводле альфабэту?”

(Павал Колас: ) “Мы, канечне, плянуем усё гэта значна пашырыць, увесьці там функцыі пошуку і магчыма яшчэ нейкія дадатковыя слясыфікацыі. Магчыма, паводле рэгіёнаў і гэтак далей”.

(Сокалаў-Воюш: ) “Ці мяркуеце вы паставіць на старонцы пашуковік тыпу таго, які стварыў для Беларускага Слоўніка клясычнага правапісу Андрэй Рамашэўскі? Справа ў тым, што часам ня можаш згадаць дакладна імя ці прозьвішча чалавека, альбо ня ведаеш як яно слушна пішацца. Вось жа пашуковік, які знаходзіць усе магчымыя варыянты па некалькіх літарах мог бы і прыдацца?”

(Павал Колас: ) “Можа быць, але пакуль што такіх прапановаў не паступала. Хутчэй за ўсё, мы гэта ўлічым”.

(Сокалаў-Воюш: ) “А як вы можаце пракамэнтаваць наступныя словы ізраільскага карыстальніка старонкі “Беларусы Сьвету. Знайдзі сваіх” Усевалада Лапшы?”

(Лапша: ) “Гэта вельмі цікавая старонка і мне вельмі спадабалася, што я яе спаткаў, але яна працуе ня вельмі зручна, таму што я два разы ўводзіў свае нататкі, але ўвогуле – вельмі цікава”.

(Павал Колас: ) “Справа ў тым, што ў нас быў збой сэрвэру і на нейкі час усе запісы былі згубленыя”.

(Сокалаў-Воюш: ) “Але далей усё будзе нармалёва, так?”

(Павал Колас: ) “Так”.

А цяпер меркаваньне зь Нямеччыны. З намі на сувязі Алена Шкуматава. Алена, ці дапамагла Вам як-небудзь Інтэрнэт-старонка “Беларусы сьвету”?

(Шкуматава: ) “Я адразу ж, у першы ж дзень знайшла хлопца, які жыве побач – усяго гадзіну ад мяне. Акрамя таго я лічу, што гэта вельмі добрая ідэя, бо, напрыклад, я у Гайдэльбэргу ўжо амаль што год, але яшчэ не сустрэла ніводнага беларуса”.

(Сокалаў-Воюш: ) “На момант падрыхтоўкі матэрыялу ў выданьні, якое існуе ўсяго пару месяцаў, зарэгістраваліся 37 асобаў з 15 краінаў сьвету. Найбольшую актыўнасьць праяўляюць нашыя суайчыньнікі са Злучаных Штатаў і Расеі – адпаведна 8 і 7 асобаў. Яшчэ сем краінаў маюць пакуль што па аднэй рэгстрацыі.

Днямі ў цэнтры Менску, у доме афіцэраў адчынілася новае Інтэрнэт-кавярня "Саюзonline". Кіраўнікі новага праекту сьцьвярджаюць, што гэта першая ў Беларусі Інтэрнэт-кавярня эўрапейскага ўзроўню. Новую Інтэрнэт-кавярню наведаў Віталь Цыганкоў”.

(Цыганкоў: ) “У поўдзень, калі я прыйшоў у новае Інтэрнэт-кафэ, кліентаў там было, скажам шчыра, небагата. Урэшце, як я зразумеў потым пасьля размовы з кіраўніцтвам "Саюзonline", для іх галоўнае якасьць, а не колькасьць. Зграбны інтэр'ер, карціны на сьценах, смачная кава, кандыцыянэр - вельмі рэдкая для Беларусі зьява, а таксама адносна высокія кошты падключэньня ў Сеціва - усё гэта гаворыць пра тое, што новая Інтэрнэт-кавярня задуманая як стыльнае і нават можна сказаць, элітнае месца для карыстальнікаў Інтэрнэту. Заснавальнікі "Саюзonline" наўмысна так будуюць сваю палітыку, каб у кафэ прыходзілі пераважна сур'ёзныя кліенты. Падлеткі-геймеры знойдуць сабе больш таннае месца, тым больш што кавярня ўвогуле не зьбіраецца спецыялізавацца на кампутарных гульнях. Для гэтага ёсьць дзясяткі падпольных Інтэрнэт-кропак, якія працуюць нелегальна і без ліцэнзіі. Але гэта не тая ніша, у якой зьбіраецца здабываць сваіх кліентаў "Саюзonline". Кіраўнік кавярні Віталь Буйноў прызнае, што іхні праект як бы забягае наперад, імкнецца працаваць на пэрспэктыву”.

(Буйноў: ) "Рынак Інтэрнэту ў нас вельмі слаба разьвіты, у Беларусі ён толькі пачынаецца. І наша функцыя ў тым, каб фармаваць гэты рынак, пашыраць кола карыстальнікаў. Мы прыйшлі на гэты рынак, спадзяюся, надоўга, і многія рэчы будзем рабіць першымі, што нас урэшце не бянтэжыць".

(Цыганкоў: ) “Апошнім часам у Байнэце разгарнуліся гарачыя дыскусіі наконт рэгістрацыі наведвальнікаў Інтэрнэт-кавярняў. Віталь Буйноў паведаміў, што ў "Саюзonline" ад кліентаў просяць толькі запісаць сваё прозьвішча. Пашпарту пры гэтым не патрабуецца, і сапраўднасьць пададзеных зьвестак ніхто не правярае. Дарэчы, Буйноў кажа, што падчас працэдуры рэгістрацыі прадпрыемства знаходзіла поўнае паразуменьне ва ўлады.

Натуральна, што сёньня ў Беларусі Інтэрнэт-кафе ня можа адразу ж стаць акупляльным праектам. Таму ня дзіўна, што "Саюзonline" адкрыла фірма, якая займаецца нафтай ды іншымі празаічнымі сфэрамі бізнэсу. Магчыма, менавіта гэта і дае магчымасць уласьнікам новага Інтэрнэт-кафэ трывала стаяць на нагах і дазваляць сабе быць стыльнымі і пераборлівымі. "Мы хочам каб гэтае месца наведвалі салідныя кліенты і ня толькі тыя, каму патрэбны выключна тэхнічны выхад у Інтэрнэт" -- кажа Віталь Буйноў”.

(Сокалаў-Воюш: ) “І на заканчэньне вынікі апошняга Інтэрнэт-апытаньня Радыё Свабода.

Чым можа скончыцца бітва за ўраджай? – пыталіся мы ў сваіх чытачоў і, як заўсёды, прапаноўвалі тры варыянты адказу. На момант падрыхтоўкі перадачы ў апытаньні ўзялі ўдзел 124 чалавекі.

У выніку (калі гэта не іронія) веру ў слушнасьць эканамічнай палітыкі ўладаў прадэманстравалі тры чалавекі, якія лічаць, што ўраджай будзе рэкордным.

Веру ў працавітасьць беларускага народу, альбо ў здольнасьці роднай зямелькі паказалі 46 асобаў. Ім падаецца, што ўраджай пераможа.

Найбольш адказаў сабраў трэйці варыянт. 76 чалавек лічаць, што бітва за ўраджай скончыцца пакараньнем вінаватых”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG