Лінкі ўнівэрсальнага доступу

ЛЕАНІДУ КОЗІКУ НЕ ЎДАЛОСЯ ЗВОЛЬНІЦЬ АЛЯКСАНДРА СТАРЫКЕВІЧА


Міхал Стэльмак, Менск

Пытаньне пра звальненьне Аляксандра Старыкевіча было ўзьнятае нядаўна абраным старшынём Фэдэрацыі прафсаюзаў Леанідам Козікам. Ён патлумачыў гэта, на ягоную думку, непрафэсійным узроўнем прафсаюзнага выданьня. "Беларускі час" спадар Козік параўнаў з насьценнай газэтай. У газэце, якую рэдагуе Старыкевіч, на думку старшыні Фэдэрацыі, мала ўвагі надаецца прафсаюзнаму жыцьцю.

Аднак з такой думкай пагадзіліся далёка ня ўсе сябры прэзідыуму Фэдэрацыі. Як высьветліла галасаваньне, якое было адкрытым, толькі 12 чалавек падтрымалі Козіка. 11 прагаласавалі супраць, астатнія ўстрымаліся альбо наагул ня бралі ўдзелу ў галасаваньні. У выніку ініцыятыве Козіка у пытаньні звальненьня Старыкевіча не хапіла 6 галасоў. Такім чынам, Аляксандар Старыкевіч будзе працягваць працу на пасадзе галоўнага рэдактара "Беларускага часу". Вось як ён пракамэнтаваў нашаму Радыё вынікі сёньняшняга разгляду пытаньня пра звальненьне:

(Cтарыкевіч: ) "Мне вельмі прыемна, хаця я думаю, што наступным крокам з боку ўладных структураў будуць правакацыі на мой адрас з тым, каб усё ж такі пазбавіцца ад непажаданага галоўнага рэдактара. Я ведаю толькі адно: незалежна ад таго, хто зьяўляецца старшынём Фэдэрацыі прафсаюзаў Беларускай, пакуль я займаю пасаду галоўнага рэдактара, будуць наперадзе стаяць толькі прафэсійныя пытаньні, а не асабістая адданасьць, палітычная кан'юнктура ці нешта іншае. Мабыць, вось гэта не задавальняе цяперашніх ініцыятараў майго звальненьня, і яны спрабавалі гэтае пытаньне вось гэткім чынам "прапіхнуць".

Леанід Козік, камэнтуючы журналістам сёньняшняе рашэньне, патлумачыў яго складам прэзыдыюму, які ён лічыць слабым. І падобна на тое, што Леанід Козік не зьбіраецца мірыцца са сваёй сёньняшняй паразай:

(Козік: ) "Мы абавязкова зробім гэтую газэту нармалёвай. Палітычныя "інтрыжкі" там скончацца. Калектыў там моцны. Карэспандэнты малайцы. Мы накіруем іх на канструктыўную працу. Я мяркую, што зь цяперашнім галоўным рэдактарам мы гэтага ня зробім. Гэта цудоўна разумее і цяперашні галоўны рэдактар, і тыя, хто яго абараняе. Я думаю, што гэта мы зробім з новым рэдактарам, і вельмі-вельмі хутка".

Пры гэтым Леанід Козік не патлумачыў, якім чынам адбудзецца новая спроба зьмены галоўнага рэдактара "Беларускага часу".
XS
SM
MD
LG