Любоў Санкевіч працавала бугальтаркай на Бабруйскім заводзе трактарных дэталяў і была звольненая адміністрацыяй пасьля таго, як заявіла ў кантрольныя органы пра тое, што кіраўніцтва прадпрыемства знарок падвышае сабекошт прадукцыі.
Галіна Гусева — маці пяці дзяцей. Пачынаючы з 1990 году, цягам чатырох гадоў яна ўносіла грошы прадпрыемству “Фандок” на будаўніцтва катэджу, але ў выніку не атрымала ні жытла, ні грошай. І Галіна Гусева, і Любоў Санкевіч неаднойчы зьвярталіся па дапамогу да ўладаў. Летась у жніўні яны ладзілі 10-дзённую галадоўку, а ў сьнежні выходзілі з плякатамі на плошчу Незалежнасьці, патрабуючы сустрэчы з Лукашэнкам, за што былі затрыманыя міліцыяй і пакараныя штрафам.
Цяпер жыхаркі Бабруйску чарговы раз спадзяюцца трапіць на прыём да Лукашэнкі. Гаворыць Галіна Гусева:
(Гусева: ) “Я буду змагацца. Няхай аддадуць маім дзецям тое, што яны павінныя былі атрымаць яшчэ дзесяць гадоў таму”.
Працягвае Любоў Санкевіч:
(Cанкевіч: ) “Калі сёньня ці за гэты тыдзень маё пытаньне ня будзе вырашанае, буду зьвяртацца ў Расею, паеду ў Расею. Ці ўвогуле зьеду зь Беларусі. Таму што я не ўяўляю — як можна жыць далей у нашай рэспубліцы?”
Жанчыны зьбіраюцца стаяць у пікеце на плошчы Бангалёр да 1 жніўня.
