На паседжаньні Савету бясьпекі 10 ліпеня Аляксандар Лукашэнка заявіў, што трэба вызначыць новыя падыходы да супрацоўніцтва паміж Беларусьсю ды NATO. Паводле беларускага кіраўніка, нельга ня ўлічваць новыя міжнародныя рэаліі — пашырэньне NATO на ўсход, новы ўзровень партнэрства паміж NATO і Расеяй, жаданьне Ўкраіны далучыцца да Альянсу, а таксама пагрозы міжнароднага тэрарызму.
Якія чаканьні маюць у NATO ў сувязі з гэтымі заявамі Лукашэнкі? Гаворыць прэсавы сакратар арганізацыі Робэрт Пшчэль:
(Пшчэль: ) “Мы заўважылі гэтыя заявы, мы прачыталі пра іх у прэсе. Цяжка тут прапанаваць нейкі камэнтар. Што тычыцца чаканьняў краінаў-сябраў NATO датычна Беларусі, я думаю, што як і іншыя міжнародныя арганізацыі — АБСЭ, Рада Эўропы, Эўрапейскі зьвяз і гэтак далей — мы чакаем вышэйшых дэмакратычных стандартаў. Гэта сапраўднае чаканьне ў тым, што тычыцца Беларусі”.
Беларусь удзельнічае ў праграме NATO “Партнэрства дзеля міру” і ёсьць сябрам Эўраатлянтычнай рады партнэрства, хоць яе ўдзел далёка ня самы актыўны, кажа прэсавы сакратар NATO. У той жа час Аляксандар Лукашэнка па-ранейшаму кажа пра катэгарычнае непрыняцьце пашырэньня NATO на ўсход. Вось як гэта пракамэнтаваў Робэрт Пшчэль:
(Пшчэль: ) “Гэта, па-праўдзе, вельмі старая спрэчка. Яна, як выглядае, выйшла з моды, ня толькі ў краінах NATO ці ў краінах-кандыдатах, але, калі пагледзець навокал, і ў многіх іншых краінах, у тым ліку краінах-суседзях Беларусі. Відавочна, што яны ня маюць страхаў ці крытычнай ацэнкі пашырэньня, якія існавалі ў мінулым. Такія страхі ня маюць сувязі з рэальнасьцю. NATO — гэта дэмакратычная арганізацыя, якая сама прымае рашэньні аб запрашэньні новых краінаў. Гэтыя краіны маюць неад’емнае права абіраць сабе захады бясьпекі. Увогуле, гэта ўнёсак у бясьпеку і стабільнасьць у Эўропе, і гэта давялі папярэднія этапы пашырэньня NATO”.
