Лінкі ўнівэрсальнага доступу

БЫЛЫ ПРЭМ’ЕР-МІНІСТАР ПОЛЬШЧЫ НЯ БАЧЫЦЬ ПЕРАШКОДАЎ ДЛЯ ТАГО, КАБ БЕЛАРУСЬ СТАЛА “Ў ПОЎНАЙ СТУПЕНІ ЭЎРАПЕЙСКАЙ КРАІНАЙ”


Аляксей Дзікавіцкі, Варшава

У часе спатканьня з замежнымі журналістамі, адказваючы на пытаньне Радыё Свабода пра пра будучыя стасункі Польшчы як сябра Эўразьвязу зь Беларусьсю, старшыня Эўрапейскай камісіі польскага парлямэнту Юзэф Олексы заявіў, што Варшава выконвае і будзе выконваць значную ролю ў выпрацоўцы усходняй палітыкі Аб’яднанай Эўропы.

“Мы маем вялікі досьвед у стасунках з нашымі ўсходнімі суседзямі, і адносіны Брусэля з Масквой, Кіевам і Менскам ня будуць будавацца без удзелу Варшавы”, - сказаў спадар Олексы.

Былы прэм’ер–міністар Польшчы адзначыў таксама, што стратэгічным партнэрам Польшчы на Ўсходзе застаецца Ўкраіна, аднак вялікая ўвага надаецца таксама і стасункам з Расеяй.

Гаворачы пра Беларусь, Юзэф Олексы паведаміў Радыё Свабода наступнае.

(Олексы: ) “Калі гаварыць пра Беларусь, то хачу выразна падкрэсьліць, што стасункі з гэтай краінай ня ёсьць выключна вынікам стаўленьня Польшчы да Беларусі. Гэта пытаньне стратэгічнага выбару самой Беларусі. Беларусь усё яшчэ знаходзіцца перад выбарам стратэгічнай лініі, а таксама перад неабходнасьцю дэмакратызацыі свайго ўнутранага жыцьця. Пакуль мы бачым, што Беларусь ідзе ў кірунку Расеі, ідзе на цеснае збліжэньне з Масквой. Я як добразычлівы сусед лічу, што Беларусь магла б быць краінай Эўрапейскай у поўнай ступені, бо няма для гэтага перашкодаў. Але выбар належыць да самой Беларусі. Што там дзеецца цяпер, вядома ўсім”.
XS
SM
MD
LG