Лінкі ўнівэрсальнага доступу

logo-print

СЯМ’Ю ЗЬБЕГЛАГА Ў НАРВЭГІЮ СУПРАЦОЎНІКА КГБ НЕ ВЫПУСКАЮЦЬ ЗЬ БЕЛАРУСІ


Алег Грузьдзіловіч, Менск

Фармальна супрацоўнікі Першамайскай міліцыі Менску спаслаліся на тое, што бацька дзяцей ня даў дазволу вывозіць іх за мяжу. Між тым, дзеці зьбіраюцца ехаць якраз да бацькі, які іх чакае і даслаў адпаведную паперу ў Менск.

(Інэса Ўгляніца: ) “Я заношу дакумэнты, а мне іх вяртаюць, і гэтак шмат разоў. Увесь час іх нешта не задавальняе. Муж у нарвэскага натарыюса зацьвердзіў сваю згоду на выезд дзяцей за мяжу, я занесла гэтую паперу ў АВІР, а там цяпер кажуць, што згоду трэба зацьвердзіць яшчэ і ў беларускім консульстве ў Нарвэгіі, — маўляў, такі парадак для ўсіх грамадзянаў за мяжой. Але, як вы лічыце, хіба ён можа туды пайсьці?”

Паводле Інэсы Ўгляніцы, муж не прыходзіць у консульства, бо баіцца, што яго там затрымаюць і пад прымусам вывезуць у Беларусь. Можа падацца, што такая апэрацыя часу халоднай вайны цяпер немагчымая, але ў былога супрацоўніка КГБ Генадзя Ўгляніцы на гэта іншае гледзішча. Баючыся нядаўніх калегаў, ён нават жонцы не паведамляе свайго цяперашняга адрасу.

Нагадаю, былы супрацоўнік аддзелу КГБ па Менску і Менскай вобласьці Генадзь Угляніца ўцёк у Заходнюю Эўропу пасьля публічных абвінавачаньняў на адрас кіраўніцтва краіны ў датычнасьці да выкраданьня вядомых апазыцыянэраў Віктара Ганчара і Анатоля Красоўскага. Гэтыя абвінавачаньні Ўгляніца абгрунтаваў вынікамі асабістага расьсьледаваньня справы Ганчара і Красоўскага, якое ён вёў разам з актывістам арганізацыі “Край” Андрэем Жарнасекам.

Паводле Ўгляніцы і Жарнасека, яны нават знайшлі месца, дзе злачынцы схавалі аўтамабіль, у якім былі захопленыя Ганчар і Красоўскі. Але раптам пра расьсьледаваньне стала вядома беларускім спэцслужбам — тады Ўгляніца і Жарнасек вымушаныя былі пакінуць Беларусь. Цяпер яны жывуць у Нарвэгіі, дзе атрымалі статус палітычных уцекачоў, вывучаюць нарвэскую мову і плянуюць зьяднацца зь сем’ямі. Генадзю Ўгляніцу гэта пакуль не ўдаецца.

Жонка Андрэя Жарнасека Тацяна празь месяц пасьля ад’езду мужа нарадзіла трэцюю дачку і цяпер занятая выхаваньнем дзяцей. Тацяна Жарнасек не выключае, што і яе чакаюць тыя ж праблемы, зь якімі сутыкнулася Інэса Ўгляніца, калі сабралася ў Нарвэгію да мужа.
XS
SM
MD
LG